Kielsen aamma Lars-Emil assortuupput
Partiip siulittaasua isumaqarpoq, Lars-Emil Johansen 2014-mi partiimi siulittaasunngorniunnermi qinigaannginnini mamiatsassutigeqqagaa.
- Pissaanermik tiguserusunneq pineqarpoq, Siumut Partiimi 2014-mi immikkut ittumik ataatsimeersuartoqarmat Lars-Emil Johansen siulittaasumut unammillerami siulittaasunngunngitsoornini anniarigamiuk, - allamik naamik taamak issaritsigisumik oqarusuppunga, Partiip Siumup siulittaasua Kim Kielsen taama oqarpoq.
AAMMA ATUARUK Lars-Emili avissaartuutsitsivoq
Taamaanneraaneq Lars-Emil Johansenip ilumuunnginnerarpaa, naamminermi ukiut 50-it sinnerlugit politikkimik suliaqareerluni politikkikkut qaffannissaminki pilersaaruteqanngilaq pissaanermillu tigusiniarnermik siunertaqarani.
- Pissaaneqarniunnermik oqartoqarnera isumaqatiginngilara, isummersorneruvoq, Lars-Emil Johansen oqarpoq, - aamma neriuppunga uunga killittoqanngisaannassasoq, partiimi imaluunniit nunami maani isummersorneq inerteqqutaalissasoq , - siuttoq isumaqatiginngikkaanni isummamik annitsisoqartussaanngitsutut killiffigineqalernissaa, neriuppunga killiffiginngisaannassagipput, Lars-Emil Johansen oqarpoq.
Partiimi Siumut siulitaasoq Kim Kielsen oqarpoq qanga partiimi oqallittarneq siammasinnerusarsimasoq tamannali maannakkut taamaakkunnaartoq. isummat assigiinngitsut oqallisigineqartarsimapput assortuussutigineqartarsimallutillu,
- Tamanna maannakkut atorneqarunnaarpoq Kim Kielsen oqarpoq.
Taanna isumaqarpoq Lars-Emil Johansen avissaartuutitsinermik siuttunera inuiaqatigiit sullinniarnerannut nukippassuarnik atuisitsisoq.
- Massakkut isertuunneqarsinnaanngilaq, Lars-Emil Johansen avissaartuutitsinermi siuttuuvoq, tamanna miserratigineqarsinnaanngilaq, saqittaatsoqartillugu nukippassuit atorneqartarput, inatsisartuni, naalakkersuisuni aamma innutaasut kiffartuunneqarnerinut atorneqartussaagaluartut, Kim Kielsen oqarpoq. Assigiinngitsunik isummersorneq Lars Emilip pingaartippaa
- Oqallinneq tassaavoq ineriartortitsisartoq, isummersorneq tassaavoq inuiaqatigiinni eqiingasunik pilersitsisartoq, ilatsiinnartuuneq, inuup ataatsip isumaanik isummersornissaanik isumaqarneq isumaqarpunga demokraatimut ulorianartuusoq.
Partiimi Siumumi nuimanerit marluk isumaqatigiinngissuteqarnertik pillugu oqaloqatigiinneq ajorput.
- Naamik oqaloqatigiittoqanngilaq, gruppe ataatsimiikkaangat naapittarpugut, gruppe ippassaq ataatsimiimmat uanga allanik pisassaqarlunga peqataanngilanga, gruppemi ataatsimiinnermi naapittarpugut taakkua avataatigut oqaloqatigiinneq ajorpugut,
Oqaloqatigiittoqartannginnera partiip siulittaasuanit uppernarsarneqarpoq.
Siumut inatsisartuini gruppe ippassaq ataatsimiimmat saqqummiussisoqanngilaq, kisianni aviisimi Sermitsiami allaaserineqarnera oqaluuserineqarpoq, kisianni Lars-Emil Johansen toqqaannartumik uannut oqaaseqanngilaq, Kim Kielsen oqarpoq.
AAMMA ATUARUK Lars-Emilip partiimi siulittaasua isornartorsiorpaa
