Lars-Emilip partiimi siulittaasua isornartorsiorpaa
- Partiitsinnit akisussaaffeqarfiit pingaarutillit ingerlalluartullu, soorlu isumaginninnermut aamma aalisarnermut naalakkersuisoqarfiit, partiinut allanut tunniussuunneqarnerat isornartoqartippara.
Inatsisartut siulittaasuata Lars-Emil Johansenip isornartorsiuinera, Sermitsiami, ullumi saqqummersumi, taama ilaatigut issuarneqarpoq.
Siumut sinnerlugu Naalakkersuisunut siulittaasoq Kim Kielsen ammasumik isornartorsiorpaa, Siumut allaat naalakkersuisuni ikinnerussuteqalersimanerarlugu:
- Kim Kielsenip akisussaaffeqarfiit pingaarutillit marluit partiinut allanut tunniummagit partii Naalakkersuisuni ikinnerussuteqalerpoq, Lars-Emil Johansen Sermitsiamut oqarpoq.
Borgmesterip isornartorsiuinera isumaqatigaa
Qaasuitsup Kommuniata mittarfimmik suliniutaanut "Newport"-imut tunngatillugu borgmesterip Ole Dorphip naalakkersuisunik isornartorsiuinera, Lars-Emil Johansenip aamma isumaqatigaa:
- Piviusunngortinneqarniarnera arriippallaaqaaq, uannullu allaanngilaq suliareqqusamik toqqaannartumik kinguarsaaneq, Lars-Emil Johansen Sermitsiamut oqarpoq, nangillunilu:
- Maannakkorpiaq politikkikkut aqutsineq paasiuminaappoq, Siumumi ilaasortatut qinikkatullu pissutsit naammagiinnarneqarsinnaajunnaartut iluarsineqartariaqartullu isumaqarpunga, Inatsisartut siulittaasuat Lars-Emil Johansen, Naalakkersuisunik isornartorsiuinermini ilaatigut oqarpoq.