Kielsenimut isornartorsiuisut tulleriiaattut
Kim Kielsenip Nuummut pilersaarusiarsuaq tallimanngormat isumaannakkut pilersaarutaanerarpaa tamannalu ilutigalugu borgmesteri Asii Chemnitz Narup isornartorsiungaatsiarlugu. Tamatuma kingornatigut Siumumi Naalakkersuisunilu siulittaq isornartorsiorneqaannavippoq.
- Illoqarfiup ineriartortinneqarnissaanut suliniutip aningaasartalerneqanngitsup saqqummiunneqarnerata piffissartaa eqqarsarnarpoq. Saqqummiussinissamut atortut aamma titartagartaasa ilusilersorneqarneri misissueqqaarnernit, pilersaarusiornernut aamma suliniummut aningaasaliissutit paasineqarnissaannit nukiit atorneqarnerusimarpasipput.
AAMMA ATUARUK Asii skyder tilbage mod Kielsen
Kim Kielsen Sermitsiaq.AG-mut Nuummi Siorarsiorfiup pilersaarusiorneqarneranik Kimmip isumaanik paasisaqarusuttumut taama akissuteqarluni allappoq.
Siumumi ilaasortaq kamaammertut
Kielsenip naalakkersuisuutitarisimasaa Martha Lund Olsen siulittaasuminik Isornartorsiuisut ilagaat:
- Naalakkersuisut siulittaasuat isumaqatiginngilluinnarpara Nunatsinni illoqarfiit pingaarnersaata Nuup pilersaarutaanut sakkortuumik uparuaammat. Sermersuup kommunalebstyrelseani Siumut pilersaarummut ilusilersueqataallunilu maannamut pilersitseqataavoq
AAMMA ATUARUK Kielsenip isornartorsiuinera Siumup politikkerinngilaa
- Taamaattumik pilersaarummik Kim Kielsenip piviusorsiunnginneraanini nammineerluni akisussaaffigisariaqarpaa, Siumummi taama isummernikuunngimmat.
Siumumiilli isornartorsiuisuni kisimiinngilaq. Sermersuumi kommunalbestyrelsemut ilaasortap, Per Berthelsenip siulittaasuminik naammagittaalliornini aamma saqqummiuppaa, Siumut sinnerlugu Siumut gruppianni siulittaasoq, Ane Egede Mathæussen aamma isornartorsiuivoq.
Asii taperserneqartoq
Sermersuumi borgmesterip Inuit Ataqatigiinneersup Asii Chemnitz Narupip Kimmip Siorarsiorfimmik pilersaarummut naliliinera soorunami isumaqatiginngilaa.
- Siorarsiorfimmi suliniutip isumaannakkut pilersaarutaaneragaaneq akuerinngilluinnarpara. Ilisimalluinnarparali naalakkersuinikkut piumassuseqarnermik pisariaqartitsisoqassasoq. Pissusiviatigulli nunamut siulersuinermut ineriartortitsinermullu qaffasinnerpaamik inuup akisussaaffeqartup ilapittuuteqarniannginnera iluaqutaanngilaq, Sermitisiaq.AG-imut oqarpoq.
AAMMA ATUARUK Siumut og Atassut i fælles front mod Kielsen
Atassummiillu taperserneqarpoq.
- Atassutip Naalakkersuisut ataatsimut anguniagaratik takorluukkanik isornartorsiuiinnaratik Kommuneqarfik Sermersuumi oqallisigineqatiginninnissaat kaammattuugigaa. Ineriartortitsinissaq akisussaaffeqarnissamik piviusumillu salliutitsiffiusariaqarpoq, Sermersuup kommunalbestyrelsiani Atassummiit ilaasortaq, Steen Lynge oqarpoq.
