Politikki

Paasitinneqarsinnaatitaaneq pillugu inatsisissatut siunnersuut Kielsenip tunuarteqqikkaa

Pisortat ingerlatsinerat pillugu paasitinneqarsinnaatitaaneq pillugu danskit inatsisaata naalagaaffimmi oqartussanut Nunatsinniittunut atortuulersinneqarnissaanik siunnersuut Naalakkersuisut siulittaasuata tunuarteqqippaa.

Allattoq Helle Nørrelund Sørensen

maajip 02-at 2017 11:43

Inatsisartut Allattoqarfiat tusagassiorfinnut nalunaaruteqarluni taama ilisimatitsivoq.

Siunnersuutip Inatsisartut upernaakkut ataatsimiinnerannit tunuartinneqarnissaa Inuit Ataqatigiit siulittaasuata Sara Olsvigip qanittukkut kaammattuutigaa.

Inuit Ataqatigiit siunnersuut tapersersornagu ukiarli nalunaarutigaat. Siunnersuut Danmarkimi pisortat ingerlatsinerat pillugu paasitinneqarsinnaatitaaneq pillugu danskit inatsisaata 2013-imeersup naalagaaffimmi oqartussanut Nunatsinniittunut atortuulersinneqarnissaanik imaqarpoq.

Inatsit pineqartoq politikerit oqartussallu sulinerisa innuttaasunit paasisaqarsinnaatitaanerannut sinaakkusiivoq, Danmarkimilu 2013-imi eqqunneqarmat sakkortuumik isornartorsiorneqarluni.

Inuit Ataqatigiit taamaliorput, naak aalajangiiffigisassatut siunnersuummi saqqummiunneqartumi allassimagaluartoq Naalakkersuisut isumaqatigiissut saqqummiussisuusut.

- Allannguutissat ilarpassui akerleraagut, Sara Olsvig KNR-imut allakkatigut qanittukkut taama allappoq.

AAMMA ATUARUK Nunani avannarlerni paasisaqarsinnaatitaanermut inatsit matoqqanerpaaq

Aappassaanik tunuartinneqartoq

Pisortat ingerlatsinerat pillugu paasitinneqarsinnaatitaaneq pillugu danskit inatsisaata nutarterneqarnissaa kissaatigalugu danskit naalakkersuisuisa siornatigut nalunaarutigaat. Ministerit sulinerat pillugu paasitinneqarsinnaatitaanermut inatsimmi malittarisassat tusagassiuutinut inuiaqatigiinnullu matoqqatitsivallaarnerat ilaatigut isornartorsiorneqarsimavoq.

Siunnersuut Inatsisartut ataatsimiinnerannit ukiup ataatsip iluani aappassaanik tunuartinneqarpoq.

Tamanna kingullermik 2016-imi ukiaanerani ataatsimiinnermi pivoq, paasinarsimammat Namminersorlutik Oqartussat danskilu inatsisinik atuutitsinermut ministereqarfiata inatsit Nunatsinni tamanut ammasumik tusarniaassutigisimanngikkaat.

Tusarniaanerlu ukioq manna januaarip qaammataani ingerlanneqarpoq, siunnersuullu allannguutitaqartinnagu Inatsisartut maanna ataatsimiinneranni oqaluuserisassanngorteqqinneqarluni.

Oqaluuserineqarnissaali maanna kingumut tunuarteqqinneqarpoq.

Siunnersuutip tunuartinneqarneranut suna tunuliaqutaanersoq akissuteqarfigeqqullugu KNR-ip Naalakkersuisut siulittaasuat attaveqarfigaa.

AAMMA ATUARUK Danskit inatsisaata eqqunniarneqarnera GE-p isornartorsioraa

AAMMA ATUARUK Kielsenip inatsisissatut siunnersuut tunuartikkaa

AAMMA ATUARUK Paasitinneqarsinnaatitaaneq pillugu inatsisip atortussanngortinneqarnissaa IA-p tapersernianngikkaa