Kielsenip inatsisissatut siunnersuut tunuartikkaa
Kim Kielsenip naalakkersuisoqarfiata siunnersuut Inatsisartunut akuerisassanngorlugu suliakkiissutigigaluarpaa, naak tamanut ammasumik tusarniaassutigineqarsimanngikkaluartoq; maannali tassa tunuartikkaa allakkatigut pisortaanera KNR-imut akissuteqarpoq.
- Naalakkersuisut siulittaasuata ataasinngornermi Inatsisartut siulittaasoqarfiat nalunaarfigisimavaa inatsisip pineqartup ukiaanerani ataatsimiinnermi oqallisigineqarnissaa tunuartinneqartoq. Siulittaasup innersuussutigaa tusarniaaneq Kalaallit Nunaanni amigarsimasoq, pisortaq Søren Hald Møller taama allappoq.
Naalakkersuisoqarfiup ilanngullugu nalunaarutigaa siunnersuut Inatsisartuni kingusinnerusukkut sammineqarumaartoq, naammaginartumik tusarniaassutigineqareerpat.
Danskit pisortat ingerlatsinerat pillugu paasitinneqarsinnaatitaaneq pillugu inatsisaat 2013-imeersoq isornartorsiorneqartoq maani danskit ingerlatsiviinut eqqunniarneqartoq assigiinngitsunit isornartorsiorneqarsimavoq.
- Inatsit isornarluinnarpoq Danmarkimilu atuutsinniarneqarnera assut akerlilersorneqarsimavoq. Sooq inatsit taama ajortigisoq maani atuuttussatut naalakkiutigineqassava Inuit Ataqatigiit siulittaasuat Sara Olsvig sapaatip akunnera sioqqullugu taama oqarpoq. Inuit Ataqatigiit partiini kisiartaalluni siunnersuummut akerliusimavoq.
Danmarkimi inatsisinik atuutitsinermut ministereqarfik siunnersuusiortuuvoq inatsit 2013-imeersoq Kalaallit Nunaanni Savalimmiunilu danskit oqartussaaffiini siunissami aamma atuutsinneqassasoq.
