Jess G.: Kia qaammammut 3.000 koruunit inuussutigisinnaavai?
Aningaasarsiatit tigutinnagit Ilanngaassivikkoortinneqartalernissaat Naalakkersuisut sulissutigaat. Najugaqarfimmilu meeqqanik najugaqartoqarnersoq apeqqutaatillugu minnerpaaffissaliussat iluarsineqassapput.
Minnerpaaffissaliussalli ikippallaaqisut, SIK isumaqarpoq.
- Inatsisartut ilisimaannassavaat taamatut aaqqissuussinikkut ajugaasussatuaq tassaasoq nunatta karsia, SIK-p siulittaasua, Jess G. Berthelsen, oqarpoq.
AAMMA ATUARUK Ilanngaassivik iluaqutaanavianngilaq
AAMMA ATUARUK Aningaasarsiatit tigutinnagit ilanngaassivikkoortalissapput
Innuttaasut pisortanut milliardi ataatilaarlugu akiitsoqarput. Akiitsut ikilisinniarlugit akissarsiat tunniunneqannginnerini pisortanut akiitsut pisortanit ilanngaatigereerneqartalernissaat Naalakkersuisunit sulissutigineqarpoq.
Najugaqarfimmi meeqqanik 18-it inorlugit ukiulinnik angerlarsimaffimmi najugaqartoqarnersoq apeqqutaatillugu minnerpaaffissaliussat iluarsineqassapput.
100 koruunit ullormut inuussutigineqarsinnaanngitsut
Soorlu assersuutigalugu kisimiittuuguit meeraqarnallu taava akiligassat akilereerlugit qaammammut ikinnerpaamik 3.000 koruunit kontonnut nakkartinneqartassapput.
Ataatsimillu meeraqaruit kontonnut qaammammut ikinnerpaamik 4.500 koruunit nakkartinneqartassapput.
Taakkuali qanoq inuussutigineqarsinnaaneri, SIK-p takorlooruminaatsippaa.
- (Inummut ataatsimut, aaqq.) qaammammut 3.000 koruunit inuussutigineqarsinnaanngilluinnarput. Taamaammat siunnersuutigaarput taanna 5.000 koruuninut qaffaavigineqassasoq, tassami kia 100 koruunit ullumikkut ullormut inuussutigisinnaavai?
SIK-mi ilaasortat, kingumut ajornartorsioreersut, ajornartorsiorneruleqqunagit minnerpaaffissaliussat qaffaavigineqartariaqartut, siulittaasoq isumaqarpoq.
- Ilaasortagut aningaasaateqarnerulernavianngillat. Ilaasortagummi ilaat ukiumut qaammatit arfinillit arfineq marlulluunniit sulisarput, ilaallu ullormut akunnerit pingasut sisamalluunniit sulisarlutik, SIK-p siulittaasua, Jess G. Berthelsen, oqarpoq.
