Inatsisissatut siunnersuut: Aningaasarsiatit tigutinnagit ilanngaassivikkoortalissapput

Nunatsinni innuttaasut pisortanut akiitsui amerliartorunnaassapput. Naalakkersuisut akiitsunik akiliisitsisarnermik aaqqissuussamik "Ilanngaassivik"-mmik taasaminnik pilersitsiniarput. 

Innuttaasullu pisortanut akiligigassaat, soorlu ineqarnermut innaallagissamullu akiligassaat, akissarsiaannit taanna aqqutigalugu ilanngaatigineqartalissapput.

AAMMA ATUARUK Naalakkersuisut Ilanngaassivik pilersippaat

Naalakkersuisut siorna siunnersuuteqaramik, tusarniaanermi piffissaliussaq ullumimut killilerpaat.

Aningaasarsiatit tigutinnagit Ilanngaassivikkoortalissapput. Akileraarutissatit akiligassatillu allat, soorlu ineqarnermut, innaallagissamut imeqarnermullu akiligassatit, tassani ilanngarneqareeraangata, akissarsiavit sinneri kontonnut aatsaat nakkartalissapput.

Aningaasaqarnermut naalakkersuisup inatsisissatut siunnersuutaani tamanna atuarneqarsinnaavoq.

Innuttaasut pisortanut akiitsui amerligaluttuinnarput. Tamannalu killormut saatsinniarlugu Naalakkersuisut Ilanngaaserivik aaqqissuuppaat, aaqqissuussarmi taanna atorlugu innuttaasut akiitsullit akiitsuinik akiliisitsiniarnermik pisariillisaataassasoq, siunnersuummi allassimavoq.

Akissarsialli tamaviisa akiligassanut atorneqassanngitsut, Naalakkersuisut sillimmasiipput.

AAMMA ATUARUK Meeqqanut akiitsullit sukaterinikkut akiliisinneqartartussanngortut

Najugaqarfimmi meeqqanik 18-it inorlugit ukiulinnik angerlarsimaffimmi najugaqartoqarnersoq apeqqutaatillugu minnerpaaffissaliussat iluarsineqassapput. 

Taavalu aamma innarluutillit inuillu allat immikkut pisariaqartitsisut pineqarpata, minnerpaaffissaliussat qaffanneqarsinnaapput.

Akissarsiallu qaammammi ataatsimi naammassimanngippata, akiligassat akilerneqartussatut Ilanngaassivimmi qaammatini pingasuni aamma uninngasinnaasut, siunnersuummi allassimavoq.

Innuttaasut pisortanut akiitsui akilinngitsoorneqarsimasut maannakkut 930 millionit koruunit missaanniipput.