KANUKOKA-mi ilaasortaanissaq Ane Hansenip apeqquseraa
Ullut 38-it qaangiuppata Kommune Qeqertalik Kommuninngussaaq, Qaasuitsup Kommuniatalu KANUKOKA-mut ilaasortaanera kingornullugu KANUKOKA-mi ilaasortaalissalluni. Taamaakkaluartoq ikaarsaariarnermut ataatsimiissitaliaq novembarip 28-iani ataatsimiinnerminni aalajangiivigissavaat, januaarip aallaqqaataat 2019 aallarnerfigalugu KANUKOKA-mi ilaasortaajunnaassanerlutik.
Kommune Qeqertalimmi borgmesterinngortussap Ane Hansenip, Inuit Ataqatigiinneersup, KANUKOKA-mit sullinneqarnertik apeqquserpaa.
- Ikaarsaariarnermi sulinermi aasap ingerlanerani KANUKOKA immaqa atorfissaqartingaatsiarsimagaluarparput kisianni tassa maluginikuunnginnatsigu aamma paasiniaarujussuartuunngimmata KANUKOKA massakkut. Atorfissaqartitsinerput matussuserniarlugu Kommuneqarfik Sermersooq saaffiginikuuaarput taakkualu saaffigiuminarsimaqaat atorfissaqartitatsinnillu siunnersorlutalu ikiornikuuaatigut.
AAMMA ATUARUK Qeqertalimmi atorfinni amerlanerpaamik 50-iusussani aqqanillit suli inuttalerneqanngitsut
Kommune Qeqertallip KANUKOKA-mut ilaasortaanermini 1,4 milliuunit koruunit akiliutigisassavai, borgmesterinngortussallu Ane Hansenip maluginiarsimavaa KANUKOKA-mi sullissineq siornatigornit ajornerulersimasoq.
- Takusara uaniinniinneruvoq qullersaqarfik KANUKOKA Nuummiikkallarmat siunnersortit pitsaasut piginikuuaat, taavali Maniitsumut nuunnerminni siunnersortit taakku pigiunnaarnikuullugit. Taavalu ilisimasarujussuup taassuma atorneqarsinnaanera killilerujussuanngorpoq, apeqqusertorujussuuaralu ilaasortaaneq qanoq iluaqutaatigissanersoq, Ane Hansen oqarpoq.
AAMMA ATUARUK Kommune Qeqertalik pisortaanertartoq
