Qeqertalimmi atorfinni amerlanerpaamik 50-iusussani aqqanillit suli inuttalerneqanngitsut

Qaasuitsup Kommuniata atuukkunnaarnissaanut kommuniniillu marlunnit taarserneqarnissaanut qaammataannanngulerpoq. Borgmesterissallu marluk naapertorlugit, kommunit ingerlatsilernissaminnut piariingajalerput. Tamarmilli sulisussanik suli amigaateqarput.
Assi © : KNR
novembarip 23-at 2017 16:18

- Soorlu tusagassiornermik tunngasunik amigaateqartussaavugut. Taanna pissarsiariniartussaavarput, aamma taakkua nuna tamakkerlugu inuttassarsiugassaasarmata, Kommune Qeqertalimmi borgmesterissaq, Ane Hansen oqarpoq.

Kommunissami atorfinni amerlanerpaamik 50-iusussani aqqanillit suli sulisussarsineqanngitsut, taassuma ilisimatitsissutigaa.

Kommunissap aappaani pisortatut atorfiit tamarmik sapaatit akunnerata tulliani inuttassarsineqariissasut, Avannaata Kommuniani borgmesterissap, Palle Jerimiassenip naatsorsuutigaa.

Kommunimili atorfiusussani 82-iusuni pingasut sisamalluunniit suli inuttassarsiuunneqassasut borgmesterissap ilanngullugu oqaatigaa.

- Atorfiit nutaat nuna tamakkerlugu inuttassarsiuunneqartussaassagamik, taamaattumik taakku suli piffissartornalaassapput, Palle Jerimiassen oqarpoq, ilanngullugulu oqarluni, 2018-imi suli sulisussarsiortariaqassagunarlutik.

AAMMA ATUARUK 11 kommunemedarbejdere takker nej til Aasiaat

Kommunissat sulisussanik suli amigaateqaraluarlutik, ukiortaamiit ingerlatsinissamut piareersimangajalertut, borgmesterissat oqarput.

Kommune Qeqertalimmi atorfinni suli inuttalerneqanngitsuni aalajangersimasumik inuttalerneqarnissaannut utaqqiisaasumik inuttaqartut, Ane Hansen nassuiaavoq. Tamatuma saniatigut kommunip aningaasaqarnermut politikkissaa naammassereeritik, allattoqarfimmullu sanaartornerit nukingiunneqartut borgmesterissap oqaatigaa.

- Piareersaaterpassuarujussuagut naammasseqqissaalerput, tassa ikaarsaariarnermut ataatsimiititaliap novembarip ulluisa 28-anni ataatsimeereerpat, piariigassat kingulliit naammassisimassapput, Ane Hansen oqarpoq.

AAMMA ATUARUK Palle Jerimiassenip Ane Hansen isornartorsioraa

Avannaata Kommunissaanilu atorfiit pingasut-sisamat ingerlatsinermik suliaqarfiunatik ataqatigiissaarinermik suliaqarfiussasut Palle Jerimiassen oqarpoq.

- Ingerlatsinissatsinnut piariingajaliivittugut oqaatigisariaqarpoq, Avannaata Kommunerisassaanut borgmesterissaq, Palle Jerimiassen oqarpoq.