Ilisimasallit: Kalaallit Nunaat politikkikkut erseqqinngitsuliorpoq
- Danmark silarsuullu sinnera sunniuteqaqataaffigerusukkaanni taamaaliorneq aqqutissaanngilluinnarpoq.
Damien Degeorges, issittumi pissutsit pillugit immikkut ilisimasalittut suliaqartoq siunnersuisarfittullu Reykjavikkimi nammineq suliffeqarfiuteqartoq taama oqarpoq.
Nunanut allanut naalakkersuisup Vittus Qujaukitsup aviisimi Politikenimi siorna decembarip aqqaneq-aappaani apersorneqarnerata kingorna taama inerniliivoq.
Vittus Qujaukitsup allaaserisami qulequtaqartumi “Kalaallit Nunaat: Danmark pingaarniakujuppoq”, amerikamiut Nunatsinni sakkutooqarfigisimasaanni saliinissamik Nunatta kissaateqarneranik tusaanngitsuusaarnerarlugu Danmark isornartorsiorpaa. Amerikamiut Pituffimmi sakkutooqarfeqarnerannut Nunatta pissarsiaqaatigisartagai amerlineqanngippata - kingunissat annerpaattut -USA-p anisitaanissaa Nunatta piumasarisinnaagaa.
Taamatullu nunanut allanut politikkersorneq isumatusaarnerunngilaq. Naalagaaffiit pissusiinik ilisimatusarneq pillugu ph.d.-usoq Nunallu tamalaat akornanni Politikki pillugu Ilisimatusarfimmi adjunkti, Rasmus Leander Nielsen, aamma taama isumaqarpoq.
- Naalakkersuisut iluminni kaffisoqatigiillutik ataatsimiinnerni oqaluuserisaat qaangerlugit Vittus immaqa iliuuseqarpoq. Taamatummi oqaaseqarnissaminut piginnaatitsissummik peqarnersoq ilisimaqqissaarnagu ajornakusoortuuvoq.
AAMMA ATUARUK Inatsisartut taama suliakkiipput
Inatsisartut akuersissutigereerpaat
Naalakkersuisut siulittaasuata Kim Kielsenip naalakkersuisooqataasullu Inuit Ataqatigiit siulittaasuata Sara Olsvigip, Vittus Qujaukitsup apersorneqarnermini oqaatsit atugai kingorna isumaqatiginnginnerarpaat. Tamatumunngalu peqatigitillugu ilaatigut Siumumeersut Lars-Emil Johansenip Jens-Erik Kirkegaardillu Vittus Qujaukitsup appiussinera ilalerpaat.
Tamannalu nunatta avataani paatsiveerussaataavoq, Rasmus Leander Nielsen taama naliliivoq. Nunattami avataani uissuummissutaavoq. Aammali politikkikkut pissutsini unittooqqaffiusunut iluaqutaasinnaanerarpaa. Taamaattorli:
- Aappaatigummi kina sinnerlugu oqaaseqartoqarnersoq ilisimanngikkaanni, taava nunani tamalaani politikkikkut marlunnik paasineqarsinnaasumik oqartoqassaaq. Kalaallit Nunaat tamarmiusoq taama isumaqarpa?
AAMMA ATUARUK Danmark ilumut anneruniartuuvoq
AAMMA ATUARUK Danmarkip anneruniarnera aserorsaataalluinnarpoq
Inatsisartut oqaatigisatik puigoraat
Politikenimi apersorneqarnini tunuliaquttanimillu isornartorsiorneqarnini Vittus Qujaukitsup kingornatigut oqaaseqarfiginngilaa. Paasissutissalli KNR-ip pissarsiarisimasai naapertorlugit isornartorsiorneqarnini paasiuminaatsippaa.
Politikenimimi oqaatigisai, aalajangiiffigisassatut siunnersuutip Inatsisartut isumaqatigiissut novembarip qaammataani akuersissutigisaata imarisaanut annertunertigut naapertuuppoq. Tassani ilaatigut ima allassimasoqarmat:
"Kalaallit Nunaanni amerikamiut sakkutooqarfigisimasaanni tamani USA-mit aamma Danmarkimit paasisaqarnissamik saliisoqarnissamillu piumasaqaateqartoqassanera"
aamma : “ Kalaallit Nunaanni Amerikap sakkutooqarnikkut najuuttuarnissaata kissaatigineqannginneranik tikkuaasumik,
Kalaallit Nunaannut pingaarutilinnik aningaasaqarnikkut ilaqartoqassanngippat”
Politikenimili apersuineq saqqummiunneqarmat, aalajangiiffisassatut siunnersuut pineqartoq Inatsisartuni politikerit puigorsimarpasippaat, Damien Degeorges taama isumaqarpoq.
- Akuersissutigisimasat illersussallugit soorunami pingaartuuvoq. Aamma apeqqutit Kalaallit Nunaannut mianernarsinnaasut (USA-p Nunatsinniinneranut tunngasut, aaqq.) oqallisigissallugit qunugineqassanngilaq.
Qujaukitsulli oqaatigisai Kalaallit Nunaata kissaataata danskit politikeriisa akornanni eqqartornissaannut immaqa ajornakusoortitsilersimasinnaapput, Damien Degeorges taama isumaqarpoq.
- Danskit ilarpassuisa Kalaallit Nunaata Issittullu oqallisiginissaat qunugisupilussuuaat. Taamaammat aamma oqallinneq eqqissisimasumik torersumillu ingerlanneqartariaqarpoq, aamma Danmarkimi.
AAMMA ATUARUK Inatsisartut taama suliakkiipput
Qujaukitsup taperseqqinneqartoq
KNR-ip allagaatinik takunnikkumalluni Inatsisartut nunanut allanut sillimarniarnermullu ataatsimiititaliaanni ukioq manna februaarip 25-ani ataatsimiinnermi Vittus Qujaukitsup saqqummiinermini allagaatai pissarsiarai, taakkunanilu atuarneqarsinnaavoq Inatsisartuni novembarip qaammataani aalajangiiffigisassatut siunnersuutigineqartup ataatsimiititaliamit isummerfigineqarnissaa Qujaukitsup noqqaassutigigaa.
Ataatsimiititaliamilu siulittaasup tullia Justus Hansen (D) naapertorlugu ataatsimiititaliaq "tamakkiisumik tapersiivoq". Taamaammat Vittus Qujaukitsup Politikenimi apersorneqarnermini tunuliaqutigisaa taperserneqarpoq, ilisimasallit taama naliliipput.
Taperseeqqittoqaraluartorli Nunarput Politikenimi apersuinerup siorna inissisimanermut naleqqiullugu nukittunerusumik inissisimanngitsoq, ilisimasallit naliliipput. Siunissamili periusineqartariaqartoq tassaatippaat atorfilittatigoortumik, ilaatigut Nunatta Washingtonimi D.C.-mi Sinniisoqarfia aqqutigalugu, oqaloqatigiinnerit ingerlanneqartariaqartut, Rasmus Leander Nielsen taama isumaqarpoq.
- Diplomatinik Issittumik Kalaallit Nunaannillu soqutigisaqartunik pissarsisinnarluni naalagaaffiup allanut attaveqarnera kigaatsoq ingerlanneqartariaqarpoq, matumunngami tunngatilugu pikkunarsaartumik iliorani tamanna angusaqarfiunerusinnaassasoraara.
