Vittusip isornartorsiuinera Christiansborgimi tupigusuutigigaat
Nunanut allanut tunngasunut naalakkersuisup nunanut allanut tunngasutigut Kalaallit Nunaata kissaataanik Danmarkip anneruniarneranik oqalunnera Christiansborgimi tupigutsaatigineqarpoq.
Kalaallit Nunaat pillugu ataatsimiititaliami siulittaasup Venstreneersup Marcus Knuthip isornartorsiuineq paasinngilaa.
- Naamik paasinngilara. Suliat assigiinngitsut pillugut Kalaallit Nunaallu qanittuaqqamik suleqatigiippugut, aamma Pituffik pillugu. Taannalu sivisuumik ingerlanneqarsimavoq. Venstret naalakkersuisuugallarmata Kalaallit Nunaata suleqatiginissaa pingaartinneqarsimaqaaq. Maannalu naalakkersuisuusut suleqatigiinnissamut isumaqatigiissutaanni allassimavoq Kalaallit Nunaannik suleqateqarnissaq assut pingaartinneqartoq. Taamaattumik uggorilaarpara isumaqatiinniarnikkuunngitsoq tusagassiuutitigulli tamakku eqqartornissaat, Marcus Knuth oqarpoq.
- Isornartorsiuininili danskit tusagassiorfiatigoortimmagu imaassimassaaq paaseqatigiissimanngitsugut.
AAMMA ATUARUK Danmarkip anneruniarnera aserorsaataalluinnarpoq
- Uanili eqqartuussisuusaassanngilanga. Ilisimaannarpara Kalaallit Nunaat qanittuararsuarmik suleqatigalugu. Pituffilli tassaavoq tamatsinnut iluaqusiisoq. Sorsunnerummi nillertup nalaani eqqissineqaannarnissaanut qulakkeereqataasimavoq. Pituffik Kitaamiut Issittumi illersornerannut suli iluaqutaavoq, tamannalu Danmarkip Kalaallit Nunaatalu soqutigisaraat. Arlaatigut tamanna isumaqatiginngikkaanni taava tusagassiuutitigut pinnani oqaloqatigiinnikkut aaqqiivigisariaqartoq, Marcus Knuth oqarpoq
AAMMA ATUARUK Isornartorsiuineq Kielsenimeerpat aatsaat ernumanissamut pissutissaqalissaanga
Socialdemokratiet, SF imaluunniit Liberal Alliance suliaq pillugu oqaaseqarusunnngillat, nunanulli allanut tunngasunut ministerip Anders Samuelsenip Politikenimi akissutaa innersuussutigalugu.
Samuelsen allappoq naalakkersuisunut pingaaruteqartoq Namminersorlutik Oqartussat suleqatigalugit Pituffimmi aamma Camp Centurymi suliat pingaarutillit aqussallugit. Taamatut kinguneqartussamik qanittumik suleqatigiiginnassaagut, aaqqiissutaasinnaasut ukkataralugit, miniseri taama akissuteqarpoq.
