Siumut: Danmark ilumut anneruniartuuvoq
Siumup politikkikkut oqaaseqartartua, Jens Erik Kirkegaard, tusagassiorfinnut nalunaaruteqarluni allappoq Danmark suleqatigiissutigisanut tunngatillugu Nunatsinnit isornartorsiorneqaraangat Danmarkimi politikerit isummersortartullu misiarlutik paasinninnatillu qisuariaateqartarnerat ajoraluartumik ilisarnaataasartoq.
Tamanna ilaatigut Camp Centurymut, Pituffimmi sakkutooqarfimmut kingullertigullu Kangilinnguani sakkutooqarfiusimasumut tunngatillugu aammalu siornatigut suliasartunut allanut atuuppoq.
AAMMA ATUARUK Danmarkip namminersornerput taamaatikkusukkaa
Isornartorsiuinerli naalaarnagu aaqqiissutissamillu nassaarniarnissamut suleqatigiinneq aqqutiginagu qisuariaatigineqartoq tassaasarpoq miserratiginninneq.
- Taamaammat, Danmarkimit qisuariarnerit tassaatillugit ikinngutigiinneq kingarneqanngitsoq, Kalaallit Nunaannit anneruniarnertut isigineqassaaq, Jens Erik Kirkegaard taama allappoq.
Nunanut allanut naalakkersuisup Vittus Qujaukitsup danskit anneruniarnerarlugit isornartorsiuinera danskit nunanut allanut tunngasunut ministeriata ministeriuneratalu ilumuunnginnerarpaat.
Aamma oqaluttuarisaanermik ilisimasallip aviisimilu Politikenimi aaqqissuisuunerusimasup Bo Lidegaardip KNR-imut oqaatigaa ministeriunerup Lars Løkke Rasmussenip Nunarput oqaloqatigeqqaarnagu kinamiut Kangilinnguit pisiarinissaannik soqutiginninnerannik itigartitsisimassappat paasilluarsinnaallugu.
AAMMA ATUARUK Danmarkip anneruniarnera aserorsaataalluinnarpoq
