Kalaallit Nunaat pillugu ataatsimiititaliap nunanut allanut ministeri isumasioqatigerusukkaa

Pituffimmi radarit nutartinneqarnissaanut atatillugu Folketingimi Kalaallit Nunaat pillugu ataatsimiititaliap nunanut allanut ministereqarfik peqatigalugu isumasioqatigerusuppaa. Ataatsimiititaliap kissaatigaa Nunarput Danmarkilu ataatsimoorlutik USA kimigiisissasut.

Nunanut allanut tunngasunut ministerip, Anders Samuelsenip Folketingimi matoqqasumik isumasioqatigiinnissami Pituffimmi radarit nutarterneqarnissaanut atatillugu Danmarki qanoq paasitinneqarsimasoq nassuiaatigissagaa, Kalaallit Nunaat pillugu ataatsimiititaliap piumasaqaatigivaa.

- Apeqqusinngilarput arlaannaatigulluunnit, Amerikamiut sakkutooqarfiat nunarsuarmioqatigiinni eqqissisimanissaq anguniarlugu suliaqarnerat. Kisianniliuna periuseq politikkikkut pingaateqartoq apeqquseripput. Tamannalu akissutissarsineqartariaqarpoq, Aleqa Hammond taama oqarpoq.

Ataatsimiititaliamullu allakkatigut akissuteqaatit tunngavigalugit Anders Samuelsenip ilisimatitsissutigaa, radarit nutarterneqarnissaanut atatillugu paasissutissanik amerlanerusunik danskit naalakkersui amerikami oqartussanut noqqaassuteqarniartut.

Tamanna pivoq USA-p milliuunerpassuit atorlugit radarinik nutarterisimasoq saqqummiunneqarmat. Tamannalu Danmarkip nunattalu annerusumik paasitinneqarsimagunannginnerinik isikkoqarpoq.

AAMMA ATUARUK Nutarteriniarnermi paasissutissiinnginneq isumaqatigiissutaasimasunut unioqqutitsisoq

- Nunarput asuleerfiunngimmat, aammalu nunarput niuerutaannaanngimmat, pingaaruteqarpoq nunap inuilu aammalu naalakkersuisui ataqqineqarlutik uani suliami ingerlatsisoqassasoq, Aleqa Hammond oqarpoq.

Folketingimi Kalaallit Nunaat pillugu ataatsimiititaliami Dansk Folkepartiimi ilaasortaq, Hans Brodersen oqarpoq, Pituffimmi radarit nutarterneqarnerat pillugu naammagisimaaritsik, taamaattoq suliaq pillugu paasissutissiisimaneq naammassimanngitsoq.

- Radarit nutarterneqarnerat immini ajunngilaq tamatsinnummi iluaqutaasussaammat, taamaattoq pisortat suliaq pillugu minnerpaamik ilisimasaqalaarsimanissaat isumaqarpunga, Hans Brodersen oqarpoq. 

AAMMA ATUARUK Pituffik pillugu paasissutissat amerlanerusut amerikamiunit pisariaqarput

Folketingimi Kalaallit Nunaat pillugu ataatsimiititaliami siulittaasup tullia, Aaja Chemnitz Larsen isumaqarpoq paasissutissiinissaq pisariaqartoq:

- Nunanut allanut tunngasunut ministeri danskit naalakkersuisui nunatsinnilu Naalakkersuisut suleqatigalugit qulakkeerinnissaq anguniarlugu paasissutissat pillugit, aammalu paasissutissiiuarnissamut akissuteqartariaqarpoq, Kalaallit Nunaanni annerusumik suliniartoqannginneranni, Aaja Chemnitz Larsen KNR-imut taama oqarpoq.

Aaja Chemnitz Larsen aamma isumaqarpoq, suliaq pillugu USA Igalikumi isumaqatigiissut pillugu killissaminik qaangeeqqajaasoq, Pituffimmimi nutarterinermut atatillugu USA naalagaaffeqatigiinnut ersarissumik paasissutissiisimanngimmat.

- Nunanut allanut tunngasunut ministerip Kalaallit Nunaat pillugu ataatsimiititaliamut
allakkatigut akissutigisartagai naapertorlugit Danmarkip Kalaallit Nunaatalu tungaannit ersarissumik paasissutissiisoqartarsimanngilaq, tamannalu naammaginanngilluinnarpoq, Aaja Chemnitz Larsen oqarpoq.

AAMMA ATUARUK Pituffimmi radari nutarsarneqartoq

AAMMA ATUARUK Naalakkersuisup Pituffimmi nutarterineq misissuiffiginiaraa

AAMMA ATUARUK Pituffimmi aningaasaliisimaneq ataatsimiititaliami ilaasortat ilisimasaqarfiginerorusuppaat

AAMMA ATUARUK Pituffimmut aningaasaliinermi Kalaallit Nunaat akuutinneqartussaagaluarpoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!