Kalaallit Nunaanni filmiliaq filmilianik nersornaasiinermi marlunnik akissarsitinneqartoq
Atuakkiortup Kim Leinep atuakkiaa Kalak aallaavigalugu filmiliaq filmiliat torrallataanerpaat nersornaaserneqarnerani Spaniami San Sebastian filmfestivalimi arfininngormat nersornaasiisoqarmat marlunnik nersornaaserneqarpoq.
Danskit Filminstitut taama allaaserisaqarpoq.
Filmimik ilitsersuisoq Sverigeminngaaneersoq Isabella Eklof filmilianik nersornaasiisartut immikkut nersornaasiuttagaannik nersornaaserneqarpoq assiliillaqqinnerpaallu nersornaasiuttagaanik qallunaaq Nadim Carlsen filmimi Kalak-mi assiliisuusoq assiliillaqqinnerpaatut nersornaaserneqarpoq.
Filmimi Kalak-mi Janip Kalaallit Nunaanni inuunera isiginnaarneqarsinnaavoq taassuma ilaquttani ilagalugit Kalaallit Nunaaniinnerat filmiliarineqarpoq.
Kalaallit Nunaaniinnermini tassani najugaqartunut akuliunnissani kissaatigaa. Tassani najugaqartut Kalammik taagorneqartut.
Jan peroriartornermini kinguaassiuutitigut atornerlunneqartarnini nakorsaatinillu atornerluisuunini qaangerniarpai.
Filminik ilitsersuisartup Isabella Eklõfip filmiliaa siulleq Holiday filmilianik nittarsaassinnermi Sundance Filmfestivalimi 2018-mi takuteqqaarneqarpoq.
Danskit filmiliaannik torrallataanerpaatut nersornaasiinermi Bodil prisen-mi sisamanik nersornaaserneqarpoq.
Filmlianik assiliisartup Nadim Carlsenip assilisai arlaqarput, taakkununnga ilaallutik "Holiday" aamma "Holy Spider " kiisalu nangeqattaartuliami "The Last of Us"-mi assilisaralugit.
Filmilianik assiliisartup filmiliaa "Holiday " filmilianik nersornaasiinermi Bodil prisen nersornaatisissutigaa aamma filimiliami "Holy Spiderimi" Robertinnalluni.
Filmi " Kalak " Danmarkimi filmertarfinni aappaagu marsip ulluisa arfineq-aappaanni takuteqqaarneqarneqassaaq.
Filmip Kalaap filmiliarineqarnerani najoqqutarineqartoq Kim Leinep aamma filmiliat najoqqutassaanik atuakkiortup Sissel Dalsgaard Thomsenip suleqatigiillutik suliaraat.
Filmi suliarineqarpoq Manna Filmimit Det Danske Filminstitutimit tapiiffigineqarluni.
Filmimi inuttaapput Emil Johnsen taanna pingaarnertut inuttaalluni - Jan - isiginaartitsisartut Asta August aamma Berda Larsen kiisalu Connie Kristoffersen filmimi pingaarnertut ilaapput.
