Kalaallit nammattagalerlutik angalasut Facebookimi nuannarineqarluartut
Aappariit inigisartik, biilertik, pequtitik pigisatillu allat 2016-imi aasami tunivaat. Nunarsuarmimi angalaniarlutik aalajangersimapput. Pigisaasa nalingi angalanissamut aningaasanngortussaapput.
Michaela meeqqat atuarfiani atuarallaramili nunalerinermik nuannarisaqartuuvoq, piorsarsimassutsillu allat soqutigisaqarfigingaatsiarlugit meeraalluni alliguni nammattagalisarluni angalaarnissaminik takorluugaqartarsimavoq.
- Ilisimanngisat tamarmik soqutigiuaannarsimavakka. Ilisimanngikkaanngakkit misilittariaqartarpakka, Michaela KNR-imut oqaluttuarpoq.
Mala Nuummeersoq inuusuttut piorsarsimassusaanni nutaalianik iliuuseqartartutut, nittartakkatigut attaveqatigiiffinni aliikkutaralugu isiginnaagassianik ikkussuisartutut ilisimaneqartoq. Taanna nunarsuarmiunit allanit immikkoortutut misigisimavoq, Michaelallu isummaminik nunarsuarmi angalaarnissamik oqaluttuummani suliniutini unitsiinnarlugit isummamut ilannguppoq.
- Nunarsuaq takorusuppara piorsarsimassutsillu allat inuillu assigiinngitsut naapinneratigut eqqarsartaaseralu allanngortikkusullugu, Mala KNR-imut oqarpoq.
Cannabisimik suliaqartut
Aappariit nammattagalisarlutik angalasut nunani assigiinngitsuni tikitaminni namminneq kajumissusertik atorlugu sulisimapput. Naasulerinermik, naatitalerinermik suliaqarsimapput aammalu meeqqanik paarsiutigalutik tuluttut oqaatsinik immannguarlu kalaallisut ilinniartitsisimapput. Taamaaliornikkullu inissaqarlutillu akeqanngitsumik nerisaqarsinnaasarsimapput.
Italiamiinnerminni cannabisinik naatitsivimmi nammineq kajumissutsiminnik suliaqarsimapput. Tassanilu cannabisit nerineqarsinnaasut aanngajaarniutaanngitsut suliarisimavaat.
- Naatitanik katersuereernermi naasortaat naatitassartaallu immikkoortitertarpagut tuniniarlugillu. Naatitassartaat proteineqartorujussuupput nerisassiornermilu atortarpagut, naasortaat tiitut nerisassiornermilu akuutissatut atorlugit pitsaasorujussuupput. Tassani piginnittup qimmiisa sisamat taakku ullut tamaasa nerisaraat.
- Nammineq kajumissutsitsinnik suliaqarnerput aningaasannanniutaanngilaq, cannabisili Nunatsinni paquminartorujussuusoq allatut takuniarsimavarput, Michaela Malalu oqarluttuarput.
Dominikanske Republikkimiitillugit aqqartartuni nammineq kajumissutsiminnik sulipput tassanilu arferit puisillu nerisarlugit atuisunut oqaluttuarissanngikkaat suliffeqarfiup pisortaata piumaffigisimavai. Pisortaq naapertorlugu aarfit uumasut nunarsuaanni ataqqineqartorujussuupput isiginnaaginnarneqartartuullutillu.
- Kammalaatigut oqaluttuukkaangatsigit isigisarpaatigut soorlu inunnik nerisartutut. Tamanna paasisinnaanngilaat, nammattakkisarlutik angalasut oqaluttuarput.
Inerteqqutaasumi tupertut
Mala Michaelalu namminneq tuperminni sinikulapput. Sumiinnerat pissutsillu apeqqutaallutik sumi sininnissaat assigiinngittarpoq. Unnuisarfinni, tikeraanut najukkani, angerlarsimaffinni, couchsurfingini (sofani) qimuttuitsuni allatullu ajornavikkaangat aqqusinerni.
- Inerteqqutaasumi tuperaangatta nuannequtaa tassaavoq, perusuersartarfeqanngimmat, uffarfeqaranilu innaallagiaqanngimmat. Internetsimut attavik Wi-fii perusuersartarfiillu atorniarlugit neriniartarfinnukartarpugut. Uffarusukkaangattalu quliuserluta sissamukartarpugut kuutsitsivigalunilu uffarfinni uffaviffioqqusaanngitsunukartarluta. Sissami nakkutilliisut quliusersortugut takugaangamikku naveertarpaatigut uagullu allagartaq ”NO SHAMPOO”-mik allassimasoq (quliuserfioqqusaanngitsoq) takunngitsuusaartarparput.
…nuannersuaarpoq!
Michaelap Malallu misigisatik amerlangaarmata suna nuannernerpaanersoq maannamut oqaatigisinnaanngilaat.
- Misigisassarsiorsinnaalluni periarfissaqarluni, misigisaqarlunilu nuanningaarmat piviusuunngissorineqaaq!
- Nuannernerpaat ilaat tassaavoq isikkivimmi allami iterluni ullormi tassani aqaguanilu susoqarnissaa ilisimanagu. Pilersaarusioqqaarnatami angalavugut, amerlanertigut tulliani sumunnarnissarput nalusarparput ullummi ataasiakkaarujoorpagut. Nuannersuaarpoq! Killeqarnani inoorujoorluni.
Aammattaaq ikinngutaat ilaqutaallu nunani assigiinngitsuni naapinniarlugit tikittarput.
Inoqatigut ilungersorput
Facebookertik ammaraangamikku ikinngutaasa nunaminni suunngitsuaraararsuit naammagittaalliutigigaat atuarlugit taakkununnga ajornerpaavoq.
- Taakkununnga inoqatitta ernumateqarnatik ulloq ataaseq sapaatip akunnera qaammalluunniit anigorniarlugu suut assoruutigisarneraat, takusimasagut, tusarsimasagut misigisimasagullu oqaluttuarerusuttaqaarput .
- Angalanitsinni misiginerlutatta ilusilersorluarpaatigut.
Nunat 20-t naammanngillat
Aappariit naammattagalerlutik maannamut angalaffigisimasaat maannamut ukuupput Danmark, Tyskland, Holland, Belgien, Frankrig, Spanien (Spaniamiut qeqeraat Gran Canaria ilanngullugu), Østrig, Schweiz, Tjekkiet, Ungarn, Slovenien, Kroatia, Italien, Brasilien, Colombia, Dominikansk Republik, Curaçao og Jamaica.
Maannakkut Thailandimiipput Asiamilu angalaarujoornissartik pilersaarutigaat. Siunissami aamma USA-mut Australiamullu angalarusupput.
Michaelap Malallu Facebookimi quppernerminni M&M Worldtourimi misigisatik assitigut isiginnaagassiatigullu oqaluttuarisarpaat.