ASSIT Kalaallit isiginnaartitsinissaannut isissutissat nungulersut

Isiginnaartitsissut kalaallit Danmarkimi inuunerannik isiginnaarianut oqaluttuassaaq. Ilitsersuisumulli isigininnaartitsisunullu sunniingaatsiareersimavoq.

Ilitsersuisup Nicolei Faberip qaammat ataaseq qaangiummat isiginnaartitsissut "Kalaallit Aalborgimiittut" piareersarlugu aallartimmagu pingaarnertut apeqqut ataasiusimavoq.

- Suliaq una aallartippara uanga nammineq ilisimasaqannginnera aammalu ilisimasaqannginninnik tupigusunnera unammillerniarlugu; sooruna Danmarkimi kalaaliulluni qanoq innersoq ilisimasaqarfiginngikkiga? Nicolei Faber nassuiaavoq.

Qallunaallu kalaallit pillugit ilisimasakinnerat isiginnaagassiami sammineqarpoq, kalaallit Aalborgimiittut isiginnaagassiami isiginnaartitseqataarusuttut namminneq nalunaarsinnaasimapput, oqaluttuassartillu oqaluttuaralugu.

Aalborg Teaterimi isiginnaartitsinerit qaqugu pissanersut uani takuuk.

Isiginnaartitsinissamut peqataarusuttut ilagaat Anna Lynge:

- Qallunaanit isigineqarnerput allatut takuneqalaarnissaa pingaartikkakku, taamaattumik isiginnaartitsinermut ilanngussimavunga.

Isiginnaartitsinissamullu piareersarnerit inuttut pissarsiaqarnarsimapput.

- Pissanganarsimavoq inuttut aamma ineriartornaqaaq, aamma saniatigut anaanannut, assersuutigalugu, qanillisimaqaanga.

Anaanaalu, Marie Møller Lynge, aamma isiginnaartitsinermut peqataaniarpoq. Taassumalu ilaanermini ilikkakkani ima oqaasertalerpai:

- Eqqartueqatigiissinnaaneq. Ammasumik inoqatit akornanni aamma saqqummiussineq annernaraluarluni ajunngitsuusoq.

Aamma atuaruk Aalborgimi isiginnaartitsisarfiup kalaallit sammigai

Ammasumillu saqqummiussisoqarpoq. Taamaalisoqarneranilu Nicolei Faberip isiginnaartitsissutip suliarinerani paasisimasani isiginnaartut paasissagaat neriuutigaa.

- Qallunaat isiginnaariassappata neriuutigaara kalaallit pillugit allatut takorluuilissasut. Kalaallit uagutsitulli naliginnaaqqinnaamik inuuneqarput, uagutsitullu aamma ajornartorsiuteqartarlutik. Neriuppungalu kalaallit isiginnaariartut paasineqartutut misigissasut, oqaluttuassaallu pingaartinneqartut misigissagaat, Nicolei Faber oqarpoq.

Kalaallit arfineq-marluk namminneq oqaluttuatik atorlugit isiginnaartitsissummut peqataapput.
Isiginnaartitsissut sisamanngorpamiit decembarip 12-iata tungaanut takutinneqaqattaassaaq.

Maannali isiginnaartitsinissani 17-iusuni aqqanillit isissutissai tamarmik pisiarineqareerput, Aalborg Teater paasissutissiivoq.