Kalaallit Danmarkimi ilinniagaqartut immikkut malittarisassiuunneqassanngillat, Nivi Olsen taama isumaqarpoqAssi: Jonas Løvschall-Wedel/KNR

NIVI: Kalaallit ilinniagaqartut Danmarkimi SU pillugu malittarisassat malittariaqarpaat

Danmarkimi SU-mut malittarisassat allanngortinneqassappata kalaallit ilinniagaqartut immikkut aaqqiivigineqassanngillat.

Ilinniartitaanermut naalakkersuisup KNR-imit apersorneqartilluni tamanna aalajangiusimavaa.

Danmarkimut ilinniariaraanni taava danskinut atugassarititaasut atorneqassapput.

Danskit SU-sisinnaanerannut malittarisassat naalakkersuisut allanngortissappatigit kalaallit Danmarkimi ilinniagaqartut eqqorneqariataarsinnaanerat pillugu Nivi Olsen oqarpoq kalaallit immikkut pineqarnissaasa sorsuutiginissaanut pilersaaruteqaratik.

Kalaallit Danmarkimi ilinniagaqartut malittarisassiuukkaanni "pilliutaasutut" misigitilersinnaagigut taanna isumaqarpoq.

- Uannut assut pingaaruteqarpoq politikkikkut kalerriutigissanagu kalaaliuneq pissutigalugu immikkut pineqarnissaq.

Danskit ilinniartui naammassigunik akileraarusingassanut ilanngaammik ajunngitsorsissapput, taammalillutik aningaasat attartukkatik utertikkasuarniassagamikkit.

Christiansborgimi attaviitsup Aleqa Hammonip Inuit Atatigiillu ilaasortaatitaata Aaja Chemnitz Larsenip kajumissaarutigisimavaat kalaallit Danmarkimi ilinniagaqartut immikkut pineqaqqullugit.

Aamma atuaruk Danmarkimi kalaallit ilinniagaqartut ilinniagaqarnersiutitigut eqqugaasinnaasut

Aamma atuaruk Avalak: Ilinniagaqarnersiutit pillugit siunnersuut ilinniagaqartunut ajorluinnarpoq

- Danmarkiliarneq sakkortuvoq. Ilsimavara tamaviaarnartupilussuusoq. Immikkulli pisaqassagutta iluaqusiinani ajoqusiiginnassaaq, Nivi Olsen oqarpoq.

Nivi Olsenip uparuarpaa Naalagaafeqatigiinni ilinniagaqartut atugarissaartupilussooreermata. Ilaatigut kalaallit ilinniagaqartut naammassereerlutik angerlarunik ilinniarnerminni aningaasat atukkamik ilaat utertissinnaavaat.

- Ilinniarnerat tamaat akilertarparput. Ataatsimilluunniit akiliineq ajorput. Allaat aningaasat attartugaat soorlu qarasaasianut, iPhonenut angalanernullu atorsimasaat akilertarpavut. Taamaattumik sukaterinissamut periarfissaqarpugut, Nivi Olsen oqarpoq.

Naalakkersuisut SU-mik aaqqissuusseqqinnissaat aningaasanut inatsisissamut 2025-ip tungaanoortumut maanna isumaqatigiinniutaasumut ilaapput.

Aamma atuaruk IA: Ilinniagaqarnersiutit, attaveqaatit pitsaat ajornartorsiuteqartunullu ikiuutit

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!