Danmarkimi kalaallit ilinniagaqartut ilinniagaqarnersiutitigut eqqugaasinnaasut

Danskit naalakkersuisuisa ilinniagaqarnersiuteqartitsinermik allanngortitsinissamik pilersaarutaat piviusunngortinneqqassappat, Kalaallit Danmarkimi ilinniagaqartut eqqugaassapput.
Allattoq Kenneth Elkjær
septembarip 01-at 2016 06:41
Nutserisoq Simon Uldum -

Danskit ilinniartitaanermut ministeriata Ulla Tørnæsip danskit naalakkersuisuisa siunnersuutaat 'ilinniagaqarnersiuteqartitsineq qajannaannerusoq' 2019-imi eqqunneqartussaq marlunngormat saqqummiuppaa.

Ilinniagaqartut stipendiaasa ikilisinneqarnissaat Lars Løkkep naalakkersuisuisa siunnersuutigaat, tamatumali peqatigisaanik ilinniagaqartut sulinerusinnaanerat naalagaaffimmiillu aningaasanik amerlanerusunik taarsigassarsiaqarsinnaanerat aamma siunnersuutigalugu.

Danskit naalakkersuisuisa siunnersuutaat piviusunngortinneqassappat kalaallit Danmarkimi ilinniagaqartut Danmarkimit ilinniagaqarnersiutinik SU-nik pisartagaqartut aamma eqqugaassapput. Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfimmi immikkoortortaqarfimmi pisortap Daniel Gottrupip tamanna uppernarsarpaa.

Stipendiat 20 procentinik ikilisinneqarnissaat danskit naalakkersuisuinit siunnersuutigineqarpoq. Naalagaaffimmiilli qaammammoortumik akileraarusigaanngitsumik ernialigaanngitsumillu taarsigassarsiarineqarsinnaasut 20 procentinik amerliniarpaat. Aamma ilinniagaqartut ilinniarnermik saniatigut sulinerminni akissarsiarisinnaasaat qaffaavigerusuppaat.

Ulla Tørnæs naapertorlugu taamatut aaqqissuussisoqarneratigut ilinniagaqartut ullumikkut isertitarisatik pigiinnarsinnaassavaat, ilinniarnerminnut atatillugu taarsigassarsinermikkut imaluunniit sulinerunermikkut.

 

Ilinniakkani ingerlaqqiffiusuni SU-mik pisartagaqarneq

SU ullumikkut qaammammut akileraarutit ilanngaatiginagit 5.941 koruuninik aningaasartaqarpoq. Danskilli naalakkersuisuisa taakku akileraarutit ilanngaatiginagit 4.753 koruuninut ikilisinnialersaarpaat. 800 koruunit nikingassutaapput.

 

Ilinniagaqartulli qaammammoortumik akileraarusigaanngitsumik ernialigaanngitsumillu 4.344 koruuninik taarsigassarsisinnaalissapput. Taakku ullumikkumut naleqqiullugit 1.300 koruuninik amerlanerupput.

 

Taamatut aaqqissuussisoqarneratigut qaammammut isertitarineqartut 500 koruuninik amerlineqarsinnaassapput.

 

Ilinniagaqarnersiutilli amerlanersaat taarsigassarsinermit pisassapput, taakkulu danskit naalagaaffiannut kingorna taarserneqartussaassallutik.

 

Taarsigassarsiaqarsinnaanermik periarfissaq atoraanni ukiumut taarsigassarsiarineqartut katillugit 52.000 koruuniussapput. Ullumikkut ukiumut annerpaamik 36.500 koruuninik taarsigassarsisoqarsinnaavoq. Taarsigassarsiat ilinniarnerup nalaani erniaqartinneqassanngillat.

 

Ilinniagaqartut ilinniarnermik saniatigut sulinerminni qaammammut isertitarisinnaasaat 11.992 koruuninit 12.992 koruuninut qaffaavigineqassapput.

 

Najoqqutarisaq: Danmarkimi Ilinniartitaanermut Ilisimatusarnermullu ministereqarfik

Ilanngaat anginerusoq

Ilinniakkaminnik naammasserlaanut sulinermut ilanngaat anginerusoq Ulla Tørnæsip danskillu naalakkersuisuisa aamma atuutilersinniarpaat, taamaaliornikkut ilinniarnerminnut atatillugu taarsigassarsiarisimasatik naafferartumik akilersorsinnaaniassammatigik.

Ilinniakkaminnik naammasserlaat suliffittaarunik akileraarusigassanut ilanngaatissaat ukiuni siullerni pingasuni marloriaatinngortinneqassaaq.

Akileraarusigassanut ilanngaat ukiumut 17.000 koruuninut killeqarpoq, malittarisassalli nutaat atuutilersinneqarnerisigut ilinniakkaminnik naammasserlaat ukiumut 34.000 koruuninik ilanngaateqarsinnaalissapput. Tamannalu ukiumut 8.700 koruuninik aningaasartaqassaaq, ilinniagaqarnermut atatillugu taarsigassarsiarisat naafferartumik akilersornissaannut atorneqarsinnaasut.

Kisiannertaqalaarporli. Sulinermummi ilanngaat anginerusoq iluaqutigissagaanni ilinniakkap naammassinerata kingorna Danmarkimi najugaqaannarnissaq pisariaqarpoq.

Nutaanik malittarisassiorniartoqarnera Nunatsinnut qanoq sunniuteqassanersoq Ilinniartitaanermut Naalakkersuisoqarfimmit sukumiisumik misissorneqartoq, immikkoortortaqarfimmi pisortap Daniel Gottrupip oqaatigaa.

- Inatsisiliorneq Danmarkimi najugaqaannartunuinnaq atuutissaaq. Ilinniagaqartut Danmarkimi ilinniakkaminnik naammassinninnermik kingorna Kalaallit Nunaannut utertinniarnissaannut tamanna qanoq sunniuteqassanersoq maanna misissorparput, immikkoortortaqarfimmi pisortaq oqarpoq.

Allanngortitsiniarneq danskit naalakkersuisuinit politikkikkut siunnersuutaaginnarallarpoq. Ilinniagaqarnersiuteqartitsinerup siunissami qanoq isikkoqarumaarnissaa Christiansborgimi politikkikkut isumaqatigiinniarnerit takutikkumaarpaat.