ASSIT Kalaallit futsalimik siuariartortut
Assit allaaserisap qulaaniittut takukkit, tassani arsarluarnerpaatut toqqagaasoq allallu takuneqarsinnaapput. Toqqagaasoq kalaaliuvoq.
Tjekkiami Generali Cuppimi kalaallit angusarissaarlutik tullinngormata sungiusaasup, Tekle Ghebrelulip, angusartik naammagisimaarpaa.
Unammisaqattaarnerit arfininngornermi aallartinneranni kalaallit marloriarlutik ajorsarput.
- Kukkuluttornerit, inuusuttuaqqat arsartut nutaat arsarnermut pulaniarneri arsartunilu pingaarutilinni ajoqusernerit kingorna unammisartut arsaaffimmi allanik suliassaqalerneri kingorna soorunami eqquinerlulaarput, Tekle Ghebrelul oqaluttuarpoq.
Marloriarlutik ajorsareerlutik kalaallit Tjekkiap unammisartuinut U21-usunut 8-4-mik sapaammi ajugaapput. Taakku ullup siuliani ajorsarfiginikuugaluarpaat.
- Ullup aappassaani piumassuseqarnerulerpugut - aammami ajorsarnigut ilinniarfigigatsigit. Arsarnerput iluatsilluarnerulerpoq. Utertarnigut arsaqatigiinnerpullu iluatsilluarmat, sungiusaasoq oqaluttuarpoq.
Tjekkiamut ajugaagamik finaalimi Plzen unammisussanngorpaat. Taakku Tjekkiami ligami pingajuattut inissisimapput, ukiullu qulit sinnerlugit unammisartut misilittagartuujullutik.
Kalaallit Plzenikkut naligeqalugit unammipput, unamminerulli naammassereernerani isertitseriaqattaarnermi ajorsarlutik.
- Ataatsimut tamaat isigalugu futsaleriaaseq taama pitsaatigisoq takusarput kalaallit siornatigut takunikuunngilaat, Ghebrelul oqaluttuarpoq.
Kalaallit unammiarnissaminnut qaaqqusaaqqittut
Kalaallit futsalip iluani ineriartornerat pitsaasuusoq sungiusaasoq isumaqarpoq. Tamannalu maluginiarneqanngitsuunngilaq.
- Aappaagumut qaaqqusaaqqeriikatappugut - tassanilu Tjekkiap, Slovakiap, Ungarnip Tyskillu unammisartui peqataasussat unammisinnaanissaat neriuutigaarput, Ghebrelul oqarpoq.
- Siunissaq neriulluarnaqaaq - inuusuttortagut arsarluaqaat. Aamma Nunatsinni inuusuttuaqqat neriunaatillik tullinnguukkiartorput, sungiusaasoq naggasiivoq.
AAMMA ATUARUK Futsallimik nunanut allanut unammisartut ajugaanniutivinnermi ajorsartut
AAMMA ATUARUK Kalaallit unammisartui nersualaarneqartut
AAMMA ATUARUK Nunanut allanut unammisartut piareerput
