ASSIT Kalaallit unammisartui nersualaarneqartut

Kalaallit futsalimik nunanut allanut unammisartui qallunaanut sisamanngornermi unnukkut ajorsaqqipput. Assigiinngissutsit annikitsut unamminerni marlunni aalajangiisuuffianni unammisut tamarmik pissarsiaqarluarsimanertik oqariartuutigaat.

Kalaallit qallunaat nunanut allanut unammisartuinut sisamanngornermi unnukkut 7-4-mik ajorsarput.

Ari Hermannip, Frederik Funchip John L. Brobergillu, taassumalu qallunaanut imminut måålertoortitsinera, ajugaanissamut naammanngitsoorput. 

Frederik Funch straffimi isertitsisoq. Assiliisoq: Arne Hermann

 

Mumereernermi Ari Hermann 20-nik ukiulik marloriarluni målip napasui eqqorpai, taamatuttaaq Nukannguaq Zeebip målip ikaarutaa ataasiarluni eqqorlugu. Taakku iluatsitsinerulaarsimasuugunik unamminerup inernera allatut isikkoqassagaluarpoq. 

Ataatsimut isigalugu sungiusaatigalugu unamminerit kalaallinut pissarsilluarfiusimasut Nunatta unammisartuinut sungiusaasoq isumaqarpoq. 

- Unammisartutta ilinniarfigilluarpaat – arsartut nutaat aamma misiliitippagut. Nunanut allanut unamminermik misilittagartuunut nukittunerusunullu ajorsarpugut, sungiusaatitulli pitsaavoq.

- Unamminermi erngerluta takutipparput nukingisaarsinnaanerput. Målip napasui eqquinnarnagit isertitsisarsimasuugutta ajunnginnerusumik angusaqarsimassagaluarpugut. Sungiusaatigalugu unamminerit marluk ajunngilluinnarput. Maanna Tjekkiamukalerpugut unammisartut ilisimasaqarfiginngisagut unammiartorlugit, Tekle Ghebrelul unammereernermi taama oqarpoq.  

Danskit unammisartuisa sungiusaasuat unamminerit aamma nuannaarutigai. 

- Kalaallit unammisartuisa tamaviaarusussuseqarlutik, ajugaasinnaaneq upperalugu nukingisaartitsisinnaassuseqarlutillu unammivaatigut. Europami unammisassagut aamma taamaapput, taamaammat kalaallinut unamminerput piareersaatitsialassuuvoq, Nikolaj Klein Saabye unammereernermi oqarpoq.  

Kalaallit maanna Tjekkiamukarput, tassani Generali Futsal Cuppimi peqataassallutik. 

Kalaallit qallunaallu timersuummik naligiiffigisaminnik nassaarput, tassa futsalimik unammisaleramik. Assiliisoq: Arne Hermann.

 

Isummersuutit

Inatsisartut Upernaakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!