Kalaallit atuakkiaat nunani allani nittarsaanniaraat
Nunat avannarliit atuakkialerinermut allaffeqarfiisa suleqatigiiffiata, Nordlittip, Nunatsinni atuakkiortarneq pingasunngormat immikkut oqaluuserisassanngortippaa, kalaallit atuakkiaasa nunani allani nittarsaannissaannut periarfissat eqqartorneqarlutik.
Kultureqarnermut naalakkersuisup Doris Jakobsenip Naalakkersuisut atuakkialerinermut politikkiat saqqummiuppaa, Lene Therkildsen Milik Publishingimeersoq Nunatsinni atuakkanik saqqummersitsinermi ajornartorsiutaasartut oqaluttuarai NAPA-meersullu Katja Vahlip atuakkiornermut nunani avannarlerni tapiiffigineqarnissamut periarfissat oqaluttuaralugit.
Nunatsinni nunat avannarliit allat assingalugit atuakkialerinermut allaffeqanngilaq, Kalaallilli atuakkiortut peqatigiiffiata siulittaasuata Juaaka Lyberthip allaffeqarfimmik GreenLittimik kalaallit atuakkiaannik nittarsaaffiusussamik pilersinissamik peqatigiiffiup anguniagaqarnera isumasioqatigiinnermi oqaluttuaraa.
Isumasioqatigiinneq nunanit avannarlerneersunit 19-init, Nunatsinnilu atuakkialerinermik suliaqartunit naqiterisitsisarfinneersunillu aqqaneq-marlunnik peqataaffigineqarpoq.
