Juullimi inuulluaqqussut nunatsinni immiunneqassaaq
Aallakaatitassiaq Danmarkip Radioata Nunatsinnut juullimi inuulluaqqussutigisartagaa, raatiukkut 1932-imit aallakaatinneqartalersimasoq kingornatigullu aamma tv-kkut aallakaatinneqartartoq, nunarsuarmi pisoqaanersaavoq.
Ukioq mannali allaanerussasoq DR ilisimatitsivoq, tamatumuuna Nunatsinni immiunneqartussaagami.
- Kalaallit Nunaanni immiunneqarnissaa ilumoorpoq, tamannali suli inissivinngilarput, DR-ip paasissutissiisartua Julie Breuning oqarpoq.
Nuummi, Sisimiuni, illoqarfinnilu nunaqarfinnilu allani immiunneqassaaq. Aaqqissuussineq DR-ip tusarnaartitsisarfissuani pinnani tamatumuuna kulturikkut illorsuarmi Katuami Nuummiittumi ingerlanneqassaaq. Tamannalu pissaaq juullip ulloriaata ikinneqarnerani, tassalu novemberip 30-ani.
Nunatsinnit siorna inuulluaqqusititsisoqartarlunilu ilanngutassiaqartitsisoqartarpoq, ukioq mannalu ilanngutassiat suli amerlanerusut nunatsinninngaanneersuusussanngorput. Nunarsuarmi kransit anginersaat Sisimiuniippoq, ilaatigullu tassangaannit ilanngutassiaqartoqarumaarpoq.
Juullimi inuulluaqqussut novemberimi immiunneqassaaq, DR-illu juullilivinnerani aallakaatissamaarpaa KNR-ikkullu juullikkunni aamma aallakaatinneqarumaarluni. Ullui aalajangerneqariarpata nalunaaruteqartoqarumaarpoq.
