Assi: KNR

Politikeri: Issittumi piujuaannartitsinissamik tunngaveqarluni piniartoqartarnera paasineqartariaqarpoq

Atlantikup avannaani Issittumilu nunat EU-mit, Kinamit nunanillu pissaanilissuarnit allanit uparuartorneqaratik imaani pisuussutinik uumassusilinnik piujuaannartitsinissamik tunngaveqartumik piniarsinnaasariaqarput. Savalimmiormiu Folketingimi ilaasortaq, Magni Arge, taama isumaqarpoq.

Taanna Issittoq pillugu Folketingimi suleqatigiissitameersut allat peqatigalugit Imaani pisuussutit uumassusillit piniagaanerat pillugu Christiansborgimi ullumi marlunngornermi ataatsimeersuartitsinermi aaqqissuisuuvoq.

Aalisarneq pingaartumik Savalimmiut Nunattalu aningaasaqarnerannut aalajangiisuulluinnarpoq. Taamaammat nunat taakku imaani pisuussutinik uumassusilinnik atuinertik illersortariaqarpaat, aamma puisit arferillu ilanngullugit, Magne Arge KNR-imut taama oqarpoq.

- Piujuaannartitsinissamik tunngaveqarluta imaani pisuussutinik uumassusilinnik atuisinnaanitsinnut siooranartut suulluunniit nunani taakkunani atugarissaarnermut akornutaasinnaapput. Aamma Sioorasaarinerit tusaanngitsuusaarsinnaangilluinnarpagut.

Paasissutissiinikkut aqqutissiuisoqassaaq

Aalisarsinnaatitaanerup piniarsinnaatitaanerullu illersornissaannut aqqutissaq pitsaanerpaaq tassaavoq ilisimatuussutsikkut paasissutissanik saqqummiussineq, Arge taama isumaqarpoq. Ilaatigut Atlantikup avannaani Issittumilu imaani pisuussutit nunarsuarmiut sinnerinut iluaqutissanngortinnissaannik periarfissat pillugit.

- Silatusaartumik iliortoqarneranut uppernarsaatissat tamaasa pigivagut. Tamanna atugarissaarnitsinnut iluaqutaaginnarani aamma nunarsuarmiut nerisassaqartinnissaannut iluaqutaasinnaavoq. Nunarsuarmiunummi ullumikkut 7 milliardiusunut inuussutissat naammanngilaq.

Tamatumunnga peqatigitillugu ileqquusumik aalisarnerup unikaallatsinniarnerata sutigut kinguneqartarnera siammasissumik qaammarsaassutigineqartariaqarpoq.

Assersuutigalugu uumasut uumasunik allanik nungutitsisinnaanerat, uumasut taakku aalisarnikkut killilersorniarneqanngippata, Arge taama erseqqissaavoq.


Magni: Sunniuteqaqataarusuttut akuerseqqaartariaqarput

Christiansborgimi ataatsimeersuarneq nunarsuup sinnerani paasititsiniaanerpassuit ilagiinnarpaat.

Europammi qiterpasissuani kujataanilu suliniaqatigiiffiit politikerillu imaani pisuussutit atorneqarnerinut akerleriissunik isiginnittaaseqarput, Magni Arge erseqqissaavoq.

Nunallu taakku ilaat, assersuutigalugu Issittumi Siunnersuisoqatigiinni sunniuteqaqataarusupput. Tikilluaqqusaappullu - piumasaqaat ataaseq naammassisinnaagunikku, Magne Arge taama isumaqarpoq.

- Kialluunniit siunissap qanoq ilusilerneqarnissaanik Issittumi Siunnersuisoqatigiinni aalajangersaaqataasup imaani pisuussutinik atuisinnaatitaaneq akuereqqaartariaqarpaa. Tamannaavorlu angorusutara.

Imaani uumassusillit pillugit, inuiaqatigiit aningaasaqarnerat pillugu, tusagassiuutinik aammalu kulturilerinermik suliaqartut arlallit ataatsimeersuarnermi marlunngornermi, nunatsinni nalunaaqutaq malillugu, 9.00-imit 12.30-mut ingerlanneqartumi saqqummiissaapput. Ataatsimeersuarneq Folketingip nittartagaatigut isiginnaarneqarsinnaavoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!