Inuit Silap nunani avannarlerni aalisartut ikiorniarai
Danmarkip Sverigellu imartaanni puisit ima amerlisimatigaat allaat aalisartunut akornutaalersimallutik, puisit aalisartut qassutinik pisaasa ilarpassuinik neriniartalersimammata.
Pingaartumillu Limfjordimi, Bornholmimi Sverigellu kujasinnerusuani Østersømi puisit ajornartorsiutaapput. Puisit 1970-ikkut naalernerini Danmarkimi eqqissisimatitaalerput, taamani ikitsuaranngorsimammata.
Aamma atuaruk Inuit Silap puisit pillugit paasititsiniaanera sammineqarluartoq
Inuit Silap nunani avannarlerni aalisartut peqatigalugit puisit inequnartutut pisarineqartussaanngitsutullu isigineqarnerat allanngortinniarlugu suliniuteqarniarput.
- Puisit Østersømi uumasunit allanit akornusersorneqanngillat taamaammat amerlassusaat killilersimaarneqanngippat aalisagaarunnissaata tungaanut amerliartuinnassapput. Politikerertatta innuttaasullu puisit pillugit isiginnaatsiminnik allanngortitsisinnaanissaat neriuutigaarput, Inuit Sila aviisimi Politikenimi ullumi saqqummersumi oqallissaaruteqarluni taama allappoq.
Danskit inuussutissanut ministeriat Eva Kjær aalisartut ikiorserneqarnissaannik neriorsuisimavoq, ilaatigut aalisartut immikkut toqqakkat aallaaniarnissamut allagartartaartillugit puisillu aallaanissaannut akuersissummik tunillugit.
