Inuit oqaasii Canadami pitsaanerujartuinnartumik inissisimasut
Naggueqatigiit Inuit oqaasii Canadami pitsaanerujartuinnartumik inissisimasut, Canadami Naatsorsueqqissaartarfiup kisitsisaataasa takutippaat.
Canadami nunap inoqqaavisa oqaasii assigiinngitsut 70-iupput. Indianerit Cree-t oqaasii siammarsimanerpaapput, Inuktitut tulliulluni.
Inuktitut Nunavummi Nunavimmilu atorneqarput, Inuinnaqtun Inuvialuttullu oqaatsit Issittup kippasissuani atorneqarnerullutik, taakkulu ataatsimut Inuktut taaguuteqarlutik.
Cree Inuktitullu oqaatsit ataannartussatut naatsorsuutigineqarput, siunissamilu allaat siammarnerunissaat ilimagineqarlutik.
65-ileereersimasut akornanni amerlanerit Inuktut oqaatsit ilitsoqqussaraat, tassa Inuktitut, Inuinnaqtun Inuvialuttullu oqaatsit ilitsoqqussaralugit, inuusuttullu amerlasuut Inuktut oqaatsit atuarfimmi aatsaat, aanakkuminnit aatakkuminniilluunniit ilikkarsimallugit.
Canadami naggueqatigiit Inuit 65.000-it akornanni pingasuugaangata marluk Inuktut paasisinnaallutillu allassinnaapput.
Sumiiffiilli akornanni assigiinngisitaartorujussuupput. Inuktut oqaatsit Issittup kippasissortaani Paggivittamilu nukittuallaanngillat, Nunavimmili naggueqatigiit Inuit amerlanerit Inuktitut oqaluttuullutik.
