Inatsisinik atuutsitsinermi siunnersorti eqqartuussaasimanermik aperineqanngilaq

Gerth Platou Jacobsenip immikkut siunnersortitut atorfinitsinnissaanut atatillugu oqaloqatiginerani, taassuma 2009-mi 2010-milu persuttaasimanini pillugu eqqartuussaasimanera sammineqanngitsoq, Pinngortitamut, Avatangiisinut Inatsisinillu Atuutsitsinermut Naalakkersuisoq Atassummeersoq, Mala Høy Kúko, nassuiaavoq.

Angut taanna ulluni 40-ni pineqaatissinneqarsimasunut inissiisarfimmiittussanngorlugu eqqartuunneqarpoq politiiniillu soraarsitaalluni. Kisianni taamaakkaluartoq Naalakkersuisoqarfimmi, ilaatigut inatsisinik atuutsitsinermut tunngasunik suliaqarfiusumi, qutsinnerpamik inissisimasussanngorluni  atorfinippoq.

Naalakkersuisorlu immikkut siunnersortimi soraarniutaanik tigusisoq oqaaseqarumanngeqaaq.

Kisianni Gerth Platou Jacobsenip immikkut siunnersortitut atorfinitsinnissaanut atatillugu oqaloqatiginerani, taanna pineqaatissinneqarsimannginnermut allagaqartaqarnersoq aperineqanngitsoq, Pinngortitamut, Avatangiisinut Inatsisinillu

Atuutsitsinermut Naalakkersuisoq Atassummeersoq, Mala Høy Kúko, oqarpoq. 

 - Naamik tamanna eqqaaneqanngiivippoq,  taamaammat aatsaat paasillugu  iliuuseqarpugut. Paasigatsigu taamaattoqarsimasoq, Gerthilu oqaluuteriarluta, tunuarnissani nammineerluni qinerpaa. Naalakkersuisunut uannullu oqimaalutaarusunnani tunuarnissani toqqarpaa, Mala Høy Kúko oqaluttuarpoq. 

Ilanngullugulu oqaatigaa, naalakkersuisumut ilaatigut inatsisinik atuutsitsinermut akisussaasumut immikkut siunnersortitut atorfimmut pineqaatissinneqarsimannginnermit allagartamik peqarnissaq piumasaqaataanngitsoq.

Unami pisimasoq qanoq ilinniarfigaasiuk?

- Annertunerusumik taanna pillugu oqaaseqarsinnaanngilanga, oqareernittut suliunnaareermat eqqartussavarput annertunerusumillu oqaaseqarsinnaanngilanga.

Tassa ilikkarfiginngilarsi? 

( sivisuumik nipaallisimavoq)
- Annertunerusumik oqaaseqarsinnaanngilanga ....!