Imarsiornermi atortup imaatigut isumannaallisaaneq pitsanngortippaa

Imarsiornermi sillimaniarnerup pitsanngorsaavigineqarnissaa pillugu suliniut nutaaq Danmarkimit aaqqissuunneqarsimasoq EU-mit akuersissutigineqarsimavoq. Imarsiornermi sillimaniarnerup pitsanngorsaavigineqarnissaa Issittumi immakkut angallannermut aamma atuutissaaq.

Suliniut Imarsiornermik Qullersaqarfimmit aqunneqassaaq, attaveqaqatigiinnermullu atortoq nutaaq "Maritimi Cloud", suliniummi nutaami qitiulluinnassaaq, imarsiornermi attaveqaatit atorlugit paasissutissanik paarlaasseqatigiittarneq pitsanngorsaaviginiarneqarluni.

CO2-mik aniatsitsineq uuttortarpaa

Sillimaniarnerup pitsanngorsaaviginiarneqarneranut atatillugu atortut digitaliusut ineriartortinniarneqassapput, umiarsuarmik ingerlatsineq isumannaatsuunerulersinniarneqarluni, soorlu aamma nammineq nalunaarusiorsinnaaneq CO2-millu aniatitsinerup annertussusaa naatsorsorneqarsinnaanngussalluni. Imarsiornermik Qullersaqarfik tusagassiuutinut taama nalunaaruteqarpoq.

Suliniut ataatsimut isigalugu 85 millionit koruuninik akeqassangatinneqarpoq, taakkunanngalu 70 millionit koruunit EU-mit akilerneqassallutik. Issittup imartaani angallannerup isumannaatsuunerulernissaa matumani aamma anguniarneqarmat, EU aningaasaleeqataarusuppoq.

Aamma atuaruk Issittumi angallannermut maleruaqqussut atuuttussanngortinneqalerpoq

Aamma atuaruk Issittup imartaani isumannaallisaanermut malittarisassat nutaat

Suliniut aqqutissiuinertut EU-mit nalilerneqarpoq, attaveqaqatigiinneq ullutsinnut naleqqussagaq, umiarsuarnillu ingerlatsineq pitsanngorsaaviginiarneqartoq nersualaarneqarluni, immakkullu angallannerup aaqqissugaanerusumik aqunneqalersinnaanissaa nuannaarutigineqarluni.