Issittumi angallannermut maleruaqqussut atuuttussanngortinneqalerpoq
Issittumi umiarsuit angallanneranni avatangiisit mianerineqarnissaannut maleruaqqussutissaq, Naalagaaffiit Peqatigiit imaatigut angallanneq pillugu suliniaqatigiiffiannit, IMO-mit akuersiissutigineqarpoq. Taamaalilluni 2017-mi atuuttussanngotinneqarnissaa naatsorsuutigineqarluni. Taama allappoq atuagassiaq Fiskerforum.
Allattoq Apollo Jeremiassen
oktobarip 26-at 2014 16:18
Maleruaqqussummi Issittumi imaatigut angallannermi avatangiisit mianerineqarnissaat sukannernerulissaaq ilaatigut akuutissanik uuliakoornernillu maangaannaq eqqaannginnissat inerteqqutaalersinneqassallutik. Aamma umiarsuup eqqakkanik taamatullu perusuersartarfinnit avammut eqqaaneq sukanganerusumik maleruaqqusiorneqartussanngorlutik.
Umiarsuit issittumi angallanerinut atatillugu sillimaniarnermut maleruaqqussutit upernaarli aprilimi aalajangiunneqarput. Tassalu maleruaqqussutissamut aalajangiussassat kingulliit, aappaagu upernaakkut akuersissutigineqartussaassapput. Maleruaqqussutillu 2017-mi januaarip aallaqqaataanit atuutilersinneqarnissaat naatsorsuutigineqartoq, atuagassiaq Fiskerforum allappoq.
