Ilisimatooq: Kalaallit aalisagaataat aalisakkanik allanik unammillerteqalersinnaapput
Taama naliliivoq, Aarhusip Universitetiani lektori, Peter Grønkjær, taanna silap allanngoriartornerata ilutigisaanik nunarsuatsinni imartat kissakkiartornerisa kinguneranik aalisakkat maanna imartatsinniinngitsut Nunattalu imartaanni maanna aalisagaasut unammilleqatigiilernissaannik, ilisimatuut allat peqatigalugit mississuereernerminni siulittuuteqareerlutillu.
Saarulliit raajallu maanna imartatsinniittut ulorianartorsiortinneqarsinnaasut, Peter Grønkjærip siulittuutigaa.
- Aalisakkat qangali Kalaallit Nunaata imartaanniittut, soorlu saarulliit unammillerteqalissapput raajallu aalisakkanit aalisagaqatiminnik nerisaqartunit ulorianartorsiortinneqalersinnaassallutik. Aalisakkalli nutaat imartanut allanut nuunneranni qanoq pisoqarsinnaanersoq siumut takorlooruminaattarpoq, Peter Grønkjær oqarpoq.
Aamma atuaruk Silap pissusiata allanngoriartorneratigut aalisakkat allat Issittup imartaanut nuukkiartulissasut
Silap pissusaata allanngortiartornera ilutigalugu, Kalaallit Nunaata Svalbardillu sineriaanni aalisakkat takussaasut saniatigut aalisakkanik allanik siumuisoqartalissasoq, allaallumi malunaatilimmik tamanna pissasoq, immikkut ilisimasalit paasiniaareernerminni oqaatigaat, aalisakkallu akornanni unammilleqatigiinneq aamma annertuseriassasoq siulittuutigalugu.
- Taamaalisoqarpat soorlu saarullit qalerallillu, maanna Kalaallit Nunaata imartaaneereersut, aalisakkanik nutaanik takkuttunik nerisaqalersinnaanerat ilimagineqarsinnaalluarpoq taamaalillutik taakku pitsaanerusumik atugassaqalissagaluarlutik. Taamaattoqalissappalli tamassuma suna kingunerisinnaasa maannakkut suli ilisimaneqanngilaq, Peter Grønkjær oqarpoq.
Aamma qaleralik maanna Nunatsinniittoq qaleralimmit Manerassuarmiit pisumitit unammillerteqalersinnaasoq, Peter Grønkjærip siulittuutigaa.
- Qangarsuaq Issittup imartaa sikusalermat qalerallit ataatsimooraluartut marlunngorlutik avissaartinneqarput, tassalu ilaat Kalaallit Nunaata imartaani maanna aalisagaasut allat Manerassuarmi aalisagaapput. Taakku maanna assigiinngissuteqalersimasut Kalaallit Nunaata imartaani ataatsimuulersinnaapput.
Aarhusip Universitetiani lektori, Peter Grønkjær oqarpoq, qalerallilli taakku assigiinngitsuusut ataatsimuulerneranni arlaannaalluunniit ulorianartorsiortinneqarsinnaanavianngitsoq oqaatigalugu.
Peter Grønkjær aamma oqarpoq, maanna pissutissaqarluartugut silap allanngoriartornerata ilutigisaanik pinngortitami pissutsit allanngoriartorneri malinnaavigeqqissaarneqarnissaannik.
