ATAMMIK McGregor suli kingunerlutsitsisoq
Angutip Atammimmi meeqqat ukiuni 30-ni kinguaassiutaasigut atornerluttarsimavai. Ukiorpassuilli qaangiutereeraluartut kingunerluutai suli malugineqarsinnaapput.
Namminersorlutik Oqartussat nakkutilliisuisa nalunaarusiaanni Atammimmi atornerlunneqarneqarsimasut qanoq amerlatigisut ullumikkut suli naalliuutigisaqartut uppernarsarneqartoq, KNR-imit sapaatip akunnerata siuliani oqaluttuaraarput.
Geologi Victor McGregor New Zealandimeersoq Atammimmi ukiuni 30-ni nalugaqarpoq. Meeqqat pingaartumik nukappiaqqat kinguaassiutaasigut atornerluttarsimagai ukioq 2000-imi ukiut 17-it matuma siorna paasineqarpoq.
Salomon Jakobsen maanna 42-nik ukiulik atornerlunneqarsimasut ilagaat. Qulinik ukioqarluni siullermik atornerlunneqarpoq.
- Ataasiaannalinngilaanga, ataasiaannarnikuunngilaanga taama pigaanga. Takkuninni taama pisarnikuuvoq. Sinillunga iterlunga taama pigaanga.
Suliaq Atammimmut tunngasoq
Geologip Victor McGregorip nukappiaqqat ukiukitsut nunaqarfimmi Atammimmi Maniitsup eqqaaniittumi nerrivimmi arsaararnermik sungiusartakkani kinguaassiutitigut kanngutsaatsuliorfigisarsimagai, 2000-imi maajip qaammataani saqqummiunneqarpoq. Angut tigusarineqarlunilu tigummigallagassanngortinneqarpoq. Maniitsulli isertitsivianiitilluni imminut toqunnissani toqqarsimavaa. Kingorna suliaq unitsinneqarpoq.
Salomonimullu tamakku kingunerluuteqarsimaqaat.
- Kingunerlutsinnikooqara, imigassamut peroriartorninni imigassaq ikiaroornartorlu qimaaffigisarnikuuara, matoorniarsarersuarsuaarnikuuara. Taamaasillunga oqarniarnera sivisuvoq.
Victor McGregorip meeqqat qasserpiaat atornerlussimanerai ilisimaneqanngilaq. Victor McGregor imminut toqummat suliaq matuneqarpoq.
Victor McGregorip toquneraniit ukiut 17-it qaangiussimaleraluartut nunaqarfimmut kingunerluutai suli malunnaateqarput.
Imminnut suliarisimasut oqinnerusutut nassuerutigisarpaat.
Nassuerutiginnissimanngitsulli imigassamik ikiaroornartumillu atuingaatsiartuupput.
Salomon Jakobsen imigassamik ikiaroornartumillu atornerluisuunermut pingasoriarluni katsorsartinnikuuvoq. Imigassamik ikiaroornartumillu ukiuni sisamani maanna atuisimanngilaq. Nunaqarfimmut kingunerluutit paasisinnaavai.
- Kingunerluutai assigiinngitsut uanga nammineq isinnik takusinnaallugit taavalu misigalugit aap kingunerluttutut suli ingerlasutullu suli nassuerutigissavara.
Nuna tamakkerlugu kinaassutsiminik isertuussilluni oqarasuaatikkut siunnersuiffik Attavik 146 ullut tamaasa nalunaaqutaq unnukkut arfineq marluniit qulingiluat tungaanut ammasarpoq.
