Kinguaassiuutitigut atornerluisoqarsimanera nunaqarfimmi suli kingunerlutsitsisoq
Nukappiaqqat maanna inersimasunngorsimapput namminnerlu ilaqutaqaIersimallutik. Ilarpassuilu assigiinngitsunik atornerluisunngorsimapput inuuniarnikkullu ajornartorsiuteqarlutik.
Namminersorlutik Oqartussat Qeqqata Kommuniani siorna aggustip qaammataani nakkutilliinerisa nalunaarusiarineqarnerani tamanna atuarneqarsinnaavoq.
Suliaq Atammimmut tunngasoq
Geologip Victor McGregorip nukappiaqqat ukiukitsut nunaqarfimmi Atammimmi Maniitsup eqqaaniittumi nerrivimmi arsaararnermik sungiusartakkani kinguaassiutitigut kanngutsaatsuliorfigisarsimagai, 2000-imi maajip qaammataani saqqummiunneqarpoq. Angut tigusarineqarlunilu tigummigallagassanngortinneqarpoq. Maniitsulli isertitsivianiitilluni imminut toqunnissani toqqarsimavaa.
Kingorna suliaq unitsinneqarpoq.
Atammimmiut kinguaassiuutimikkut atornerlugaasimasut pitsaaliuinermik siunnersortimit nunaqarfimmi ullup affaani sulisussatut atorfeqartumit siornatigut tapersersorneqarlutik oqaloqatigineqartarsimagaluarput. Taamatulli neqerooruteqarneq atorunnaarsimavoq kinguaassiuutimikkullu atornerlugaasimasut pillugit maannakkorpiaq suliaqartoqarani.
AAMMA ATUARUK Nakkutilliisoqatigiit: Qaasuitsup Kommuniani assigiinngitsupilussuarmik ingerlatsisoqarpoq
