Danskit naalakkersuisuisa imaani ajornartoornermi radiumut missingersuutit ilagaat
Danskit Nukissiuuteqarnermut, Pilersuinermut Silallu pissusianut ministereqarfiat KNR-imut taama ilisimatitsivoq.
Aalisartut, piniartut allallu angalatillutik ikiortissarsiornissaminnut ulloq unnuarlu periarfissaqartariaqarput.
Taamaammat Danmarkimi Nukissiuuteqarnermut aqutsisoqarfiup Illersornissamullu ministereqarfiup imaani ajornartoornermi radio - aamma Aasiaat Radioanik taaguuteqartoq - pillugu TELE Greenland A/S-imut isumaqatigiissut sivitsorpaat.
AAMMA ATUARUK Ujaarineqartoq nammineq apuuppoq
Isumaqatigiissuteqarnermi ukiumoortumik 35 millionit koruunit missaannik missingersuutigineqartut 41,4 millionit koruuninut amerlineqarput - tassalu ukiuni tullerni qulini ilassutitut katillugit 62 millionit koruunit aningaasaliissutigineqassallutik. Aningaasallu taakku ilaatigut napparutit 40-t missaanniittut ajornartoornermi radiumut atorneqartut Tele Greenlandimillu ingerlanneqartut ilarpassuinik taarsersuinissamut atorneqassapput.
- Ajornartoornermi radiumut missingersuutit ilaneqarnissaata iluatsinneqarnera iluarisimaarpara. Taamaaliornikkummi pitsaasunik atortoqarluni isumannaallisaaneq qaffasissoq attatiinnarneqarsinnaavoq, danskit pilersuinermut, nukissiuuteqarnermut silallu pissusianut ministeriat Lars Chr. Lilleholt (V) taama oqarpoq.
Immap assinginut taarsiullugu susaarnaveeqqutitut isumaqatigiissut
Immap assinginik suliaqarneq kinguaattoorutigineqartoq siorna aggustimi ataatsimiissutigineqarmat attaveqaqatigiinnermut naalakkersuisup Erik Jensenip danskillu silap pissusianut ministeriata Lars Chr. Lilleholtip immap assingi pillugit suliamut ilassutitut taasamik isumaqatigiissuteqarput.
Immalli assingi tamakkerlugit qaqugu naammassineqassanersut isumaqatigiissutigineqartumi paasinarsinngilaq. Taarsiullugu aalajangerneqarpoq Tele Greenland A/S-ip Danmarkimilu Nukissiuuteqarnermut ministereqarfiup Nunatsinni ajornartoornermi radiokkut aaqqissuussineq pillugu isumaqatigiissutaat sivitsorneqassasoq.
AAMMA ATUARUK Saammarsaatissamik imaqarpianngitsumillu isumaqatigiissuteqartut
Nunatsinni ajornartoornermi radiumik akeqanngitsumik peqarnissaq Danmarkip pisussaaffigaa, taamaammat Tele-Postimut isumaqatigiissut 2018-ip tungaanut attuummat qanoq pisoqaraluarpalluunniit sivitsorneqartussaavoq.
- Imaani isumannaallisaanerup qaffasissuunissaa pingaaruteqarpoq. Qujanartumillu umiusoqartarnera qaqutigoortuuvoq, ajortumilli pisoqartillugu ajornartoornermi radiukkut aaqqissuussineq pingaaruteqartupilussuuvoq, inuup inuuneranik akeqaratarsinnaammat, danskit nukissiuuteqarnermut, pilersuinermut silallu pissusianut ministeriat Lars Chr. Lilleholt (V) taama oqarpoq.
AAMMA ATUARUK Isumasioqatigiinneq immap assingi pillugit nutaanik paasisaqarfiunngitsoq
Immap assingi digitaliusut naammassissallugit suli amigaatigineqartut qaqugu naammassereersimanissaat suli ullulerneqanngilaq. Tamanna Danmarkimi Geodatastyrelsip Namminersorlutillu Oqartussat januaarip aqqarngani ataatsimiinneranni ilaatigut oqaluuserineqassasoq, Nukissiuuteqarnermut, Pilersuinermut Silallu pissusianut ministereqarfik KNR-imut ilisimatitsivoq.
Sunngiffimmi imaatigut angalasut immap assinginik digitaliusunik atuisinnaanissaannut periarfissat illuatungeriit ataatsimiinnermi tassani aamma oqaluuserissavaat.
