Ikinnerusut kommuninut qinersisarput
Niuertarfimmiitsillutit allamiluunniit inoqarfiusumiitsillutit inuit naapitatit quliugaangata sisamat kommuninut apriilip ulluisa sisamaanni qinerseqataannginnissaat ilimanarneruvoq.
Kommuninummi 2008-mi 2013-imilu qinersisoqarmat inuit 60 procentiinnai qinerseqataapput.
Taakkulu Inatsisartunut qinersinerniit ikinnerungaatsiarput, tassanimi qinersisut quliugaangata arfineq-marluk sinnilaarlugit peqataapput.
AAMMA ATUARUK Ilisimaneqarluartut Sermersuumi qinigassanngortittut
Ilisimatusarfimmi adjunkti Jens Wendel-Hansen naapertorlugu qinersisartut, Inatsisartunut qinersinerni sammineqartartut, soorlu aalisagartassiissutit, namminersulivinnissaq, inuussutissarsiornermut politikki uranimullu tunngasut sammineqartillugit angerlarsimaffitsik qimallugu peqataarusunnerusarput.
AAMMA ATUARUK Borgmesterit marluk sassaqqinnissaat qularnanngilaq
- Inuit tunngaviusumik isummeriaatsimut tunngasunik, soorlu assersuutigalugu nunatta sumut ingerlanissaanut tunngasunik, sammisaqarnermi aalassatsikkuminarnerussangatippakka, qanilaartunik tigussaasunillu, soorlu utoqqarnit paaqqutarinninnermut tunngasunik sammisaqarnermiit, Jens Wendel-Hansen oqarpoq.
Kommunillu atuarfeqarneq, paaqqinnittarfeqarneq pingaartumillu utoqqarnik sullissinerit suliassarisarmagit, inuusuttut ikinnerusut kommuninut qinersinermi taaserusuttartut, taassuma oqaatigaa.
AAMMA ATUARUK Qaasuitsumi ajornartorsiutit kommuninut nutaanut ingerlateqqinneqalersut
- Imaassinnaavoq kommunimi suliat inuusuttut ilaannut siunissami suli ungasilaartut. Aamma makkua paaqqinnittarfiit qanoq ingerlanneqarnersut soqutiginaateqarpasinngissinnaapput, imminnummi attuumassuteqannginnamik, taamaammallu suunersut paasiuminaassinnaallutik, Adjunkti Jens Wendel-Hansen oqarpoq.
KNR qineqqusaarneq pillugu immikkut ilisimasallit pulaartoralugit martsip 27-ani oqallitsitsissaaq. Immikkut ilisimasallit kalaallisut oqallinnerat KNR-ikkut nalunaaqutaq 19:30 malinnaavigisinnaavat, qallunaatullu nalunaaqutaq 20:30.
