Ilisimaneqarluartut Sermersuumi qinigassanngortittut
Siumumiit qineqqusaartussat marluk ilaatigut politikerit ilisimaneqartuupput, tassa Naalakkersuisunut ilaasortaasimasut marluk. Taakkunannga ataaseq Kommuneqarfik Sermersuumi borgmesterimut qineqqusaarniarmat Kim Kielsenip Naalakkersuisunit soraarsippaa. Qineqqusaartussap aappaa Jens Erik Kirkegaard aamma naalakkersuisuusimavoq.
Qinigassanngortittuni immikkut maluginiarnartut ilagaat Nicolai J. Nissen. Taanna inuussutissarsiornerup iluani ilisimaneqartuuvoq HECA Nuuk A/S-imilu pisortaalluni.
Inuit Ataqatigiinniit Hans Jukku Noahsen qineqqusaalerpoq. Taanna nipilersortartuuvoq aliikkusersuisartoq KNR-imilu aliikkutassianik ukiuni kingullermi aallakaatitsisartuulluni.
- Inuiaqatigiinnut tunniussassaqartutut misigigama qinigassanngortippunga, Hans Jukku Noahsen KNR-imut oqarpoq.
Taassuma Kommuneqarfik Sermersuumi siulersuisuni ilaasortanngussagaluaruni meeqqat atuarfii pulaffigerusuppai, meeqqanut ilinniartitsisunullu atukkat misissorlugillu pitsanngorsarusukkamigit. Hans Jukku Noahseni aamma piorsarsimassutsip iluani suliniuteqarnissamik takorluugaqarpoq, ilaatigut kulturimik sulialli meeqqat atuarfiini ilinniartitsinermi suleqatigineqarsinnaanerinik takorluugaqarluni.
Taakku saniatigut takornariaqarneq eqqarsaatigalugu periarfissat pioreersut atorlugit siuarsaanissamik takorluugaqarpoq.
Isikkammik arsartartut nunanut allanut unammisartuisa sungiusaasuat, Tekle Ghebrelul IA-miit qineqqusaarniarpoq.
Atassummiit Naalakkersuisuusimasut marluk Mala Høy Kuko Steen Lyngelu aamma qineqqusaarniarput.
Demokraatiniillu partiimi siulittaasoq Randi Vestergaard Evaldsen Nivi Olsenilu qineqqusaassapput. Taakku politikkeriupput nuimasut.
- Uanga kommunitsinni allanngueqataarusuppunga, aningaasaqarnermut naalakkersuisuusimasoq Randi Vestergaard Evaldsen Facebookimi quppernermini qineqqusaarniarluni saqqummiussigami allappoq.
Kommuneqarfik Sermersuumi partiit Partii Naleraq, Atassut, Siumut, Inuit Ataqatigiit Demokraatillu kommunimut qinersinissamut qinigassanngortitsipput. Partiinit qinigassanngortinneqartut katillugit 83-iupput.
Kommuneqarfik Sermersuumi qinigassanngortittu ilisimaneqarluartut assingi allaaserisap qulaaniittut takukkit.
