IA-p killiligaanngitsumik aalisartitsiffeqarneq atorunnaarsikkusukkaa
Inuit Ataqatigiit politikkikkut oqaaseqartartua, Bendt B. Kristiansen isumaqarpoq Naalakkersuisut nunatsinni qaleralittassiissutissanik aalajangiinerminni mianersornerungaatsiartariaqartut.
Aalisartut qaleralittassiissutissarsiatik aalisarniarnerat ilungersuutigigaat ukiumut naatsorsuinerit takutippaat.
Taamaakkaluartorli Naalakkersuisut aappaagumut pisassiissutissanik aalajangiinerminni Pinngortitaleriffimmi uumassusilerisut innersuutigisaat malinnagu qaffasinnerutitsingaatsiarput.
AAMMA ATUARUK Ukioq manna qaleralittassiissutit ilangaatsiarsui qaqinneqanngillat
Naalakkersuisut sapaatip akunnerani matumani nalunaarutigisatik pisassiissutit attatiinnarniarunikkit, killiligaanngitsumik aalisartitsiffeqarnerit atorunnaarsinneqartariaqartut, Bendt B. Kristiansen isumqarpoq.
- Inuit Ataqatigiit piumasaraarput qaleralittassiissutit taama annertutigissappata minnerpaamik killeqanngitsumik aalisartitsiffiusut killilersorneqalissasut. Tamatumani Qeqertarsuup Tunua Nuullu Kangerlua immikkut eqqarsaatigaavut, tusagassiutinut nalunaarummi allappoq.
Taassuma iliuuserineqartut maanna ingerlatiinnarnissai aarlerinartitsivallaarsorai.
- Taamak qaffasitsigisumik pisassiisoqarneratigut aarleqqutigaarput qalerallit ikiliartortut suli ikiligaluttuinnarnissaat, nunatsinnilu aalisakkani avammut nioqqutigisatsinni pingaarnerpaaq isumalluutigisarpullu nungukkiartupallassappat nunatsinnut ajorluinnartumik kinguneqassalluni. Taamaammat killiligaanngitsunik aalisartitsiffeqarneq atorunnaartariaqarpoq, Bendt B. Kristiansen allappoq.
AAMMA ATUARUK Aalisakkat pissutigalugit avammut tunisakinnerusugut
AAMMA ATUARUK De lokale kan mærke hellefiske-krisen