Hans Lyngep Aningaasaateqarfia kajumissaasiisoq

Kajumissaasiineq Nuummi Københavnimilu ataatsikkut pisussatut aaqqissuunneqarpoq, qarasaasiatigullu attaveqaqatigiittarfikkut Skypekkut attaveqatigiittoqarluni.
 
Oqallissaarisartoq Nikolaj Olsvig Andersen erinarsortartorlu Rasmus Lyberth aningaasaateqarfimmit Københavnimi nersornaaserneqarput, eqqumiitsuliortorlu tamatigoortoq Frederik Kristensen, Kunngi, isiginnaartitsinermilu ilitsersuisoq Pipaluk Kreutzmann Jørgensen, Nuummilu Atuarfik Hans Lyngemi 9. klassemi atuartut nersornaammik kajumissaaserneqarlutik. Nersornaat 10.000-it koruuninik aningaasartaqarpoq.

Immikkut nersornaasiisoqarpoq
Nunatta Isiginnaartitsisarfia immikkut aamma nersorniarneqarpoq, 100.000-it koruuninillu aningaasartalimmik nersornaaserneqarluni. Aningaasat taakku isiginnaartitsisarneq pillugu workshopimut atorneqartussatut naatsorsuussaapput, Nunatsinni isiginnaartitsisarnermik soqutiginninnerup annertusarneqarnissaa ilaatigut siunertaalluni.
 
Professori soraarneq Robert Petersen, eqqumiitsuliortorlu Bodil Kaalund, Hans Lyngep Aningaasaateqarfiani ataqqinaammik ilaasortanngortinneqarput.
 
Eqqumiitsuliortoq, atuakkiortoq taalliortorlu, qiperuisartorlu Hans Lynge, 1906-imi inunngorpoq, 1988-imilu toqukkut qimagulluni.