Amerikamiut Greenland Contractorsimut isumaqatigiissutertik sivitsoraat

Isumaqatigiissummulli millionerpassuarnik nalilimmut akerleriissutigineqartumut kina toqqarneqassanersoq amerikamiut eqqartuussiviata suli suliaraa.

Greenland Contractors Pituffimmi qaammatini arfinilinni suli kiffartuussigallassasoq  nalunaarutigineqarmat, tassani kalaallit danskillu sulisut sullisitik suli atuinnarallassavaat.

- Siullermik, sulisugut piffissami nalorninartorsiungaatsiarsimasut sulilumi nalorninartorsiortut eqqissiimisinnaangorput. Pituffimmiinnissarpullu ukiup affaanik sivitsormat maanna suliinnarsinnaagallarput, Greeland Contractorsimi pisortaq Peter Kofoed oqarpoq.

Amerikamiullu sakkutuuisa timmisartortartut Greenland Contractorsimut  isumaqatigiissutertik aappaagu marsip naaneranut sivitsoqqikkaat, Peter Kofoedip KNR-imut uppernarsarpaa.

Aamma atuaruk Eqqartuussutip inernera ingerlatseqatigiiffiit suliareqqitassanngortikkaat

Aamma naak Pituffimmi sullissinissamik isumaqatigiissut 200 milionit koruuninik nalilik Amerikamiut ingerlatitseqqiffiusumik eqqartuussuviani suli suliarineqaraluartoq.

- Eqqartuussivimmimi suliaq naammagallarnavianngitsoq takusinnaavarput. Eqqartuussivillu suli sulitillugu sakkutooqarfimmi sulinerup ingerlaannarnissaa qulakkeerniarlugu amerikamiut sakkutuuisa timmisartortartuisa Pituffimmi ingerlatsiinnarsinnaanissaq qulakkeerniarsimavaat, Kofoed oqarpoq.

Isumaqatigiissummillu sivitsuineq eqqartuussivimmi sulissanngortitseqqiinermi inerniussissutissatut tamanna takussutissiinngitsoq, Peter Kofoed isumaqarpoq.

- Eqqartuussivimmi sulineq immikkorluinnarpoq. Inuit isumaqatigiissummik eqqartueqatigisartakkagut tamatuminngaannaq oqaloqatigisarpagut. Matuminngalu  maanna isumaqatiissuteqarfigisagut pissutsinik allanik eqqartueqatiginngilagut, GC-mi pisortaq oqarpoq.

Exelis Servicep Pituffimmi kiffartuussinissamik isumaqatigiissuteqarnissaa eqqortuusoq, amerikami eqqartuussissutinik ingerlatitseqqitassanngortitsiviup aalajangiinera, suliffeqarfiit Per Aarsleffip Copenhagen Arcticillu ingerlateqqitassanngorteqqinniarlugu maannamut aalajangeqqapput.

Greenland Contractors suliamik ingerlatitseeqqissanerluni suli nalunaarutiginngilaq.