Chemnitz Larsen: EU-p puisinut tunngasunut sukaterinera Naalakkersuisut arajutsivaat?
Inuit Ataqatigiit Inatsisartuni ilaasortaatitaata Aaja Chemnitz Larsenip tusagassiuutinut nalunaaruteqarluni oqaatigaa, Naalakkersuisut nunanut allanut tunngatillugu suliassaq pingaarutilik aamma takunngitsoorsimagunaraat, tassami puisinniarnermut EU-mi inatsimmut allannguutissamut EU-p siulittaasoqarfianut aalajangiisussatut oqaaseqaateqarnissamut killiliussaq tassaammat aqagu marsip sisamaat. Allannguutissami puisinit nioqqutissianik eqqusseqqusiunnaarnermi naggueqatigiit Inuit ilaatinneqannginnerannut aalajangersagaq sukateriffiginiarneqarpoq.
Aamma atuaruk Doris Jakobsen: Puisit amiinik avammut niuernerput EU-p akornuseqqinniarpaa
EU-p eqqusseqqusinnginnermini naggueqatigiit Inuit ilaatinngimmagit, nunap inoqqaavisa puisinit tunisassiatik Europamiunut tunisinnaajuarsimavaat.
Periarfissarli tamanna EU-p malittarisassanik sukaterineratigut unitsinneqartussanngorunarpoq, Naalagaffiit Peqatigiit niueqatigiinnikkut suleqatigiiffiata WTO-p naggueqatigiit Inuit inerteqquteqarnermi peqataatinneqannginnerat nunanut puisinniartartunut allanut unammilleqatigiinnermik equtitsinerarlugu siorna oqaatigaat.
EU-p nutaamik siunnersuuteqarneratigut puisinik nammineq atugassaannarnik pisaqartoqarsinnaanissaa siunnerfigineqarpoq, tamannalu puisinniarnerup akornuserneqaatigisinnaagaa Aaja Chemnitz Larsenip oqaatigaa.
- EU-p puisinniarnermut inatsisai atuutilermatali puisinniartarneq ulorianartorsiortinneqarsimavoq, sukaterinermilu matumani Kalaallit Nunaanni puisinniarnerup inuussutissarsiutigineqarsinnaanera mattutivilluinnarneqassaaq. Puisinniarnerup inuussutissarsiutitut atuutiinnarsinnaaneranut atukkatigut pitsanngorsaanermi Kalaallit Nunaata politikkikkut sulissutiginnissimannginnera paasillugu alianartuuvoq, Aaja Chemnitz Larsen erseqqissaavoq.
Aamma atuaruk WWF-ip puisinniarneq akueraa EU-mullu piumasaqaateqarluni
Taassuma innersuussutigaa, Kalaallit Nunaanni puisinniarnerup nungusaataanngitsumik ingerlanneqarnera piniariaatsillu naapertuuttuunerat tamanit isumaqatigiissutaammat, Naalakkersuisullu erseqqarinnerusumik sulissutiginnissimannginnerat puisinniarnerullu inuussutissarsiutitut ulorianartorsiortinneqarneranut politikkikkut suliniarnerusimannginnerat tupigusuutiginerarlugu. Sukaterinerit Kalaallit Nuaanni puisinniartartunut amminillu tunisaqarnikkut ajoqusiinnginnissaannut EU-mi 'torsuusani sunniiniarnerni' Naalakkersuisut siuttuullutik suliniuteqartuusariaqarput, Aaja Chemnitz Larsen erseqqissaavoq.
Allannguutissatut siunnersuut uani atuarneqarsinnaavoq.
