Politikki Inuussutissarsiutit

PITUFFIK GC-p pisortaa: Taava politikerit sulisussanngorput

Pituffimmi sullissisussatut qinnuteqartut akornanni USA'p 2014-imi Exelis Service A/S toqqaramiuk eqqortuliorsimasoq amerikami eqqartuussiviit ilaata aalajangiuppaa.

Allattoq Helle Nørrelund Sørensen

juunip 24-at 2016 14:30

Nutserisoq Erna Lynge

Tulliinnguuttoq tassa politikerit Kalaallit Nunaanni, Danmarkimi USA-milu aalajangiissallutik Pituffimmi sullissinissaq pillugu isumaqatigiissut pillugu qanoq alloriaqqissanerlutik, Greenland Contractors taama isumaqarpoq.

Sullissisuusussat pillugit aalajangerneq ippassaq amerikami eqqartuussivimmi ingerlatitsitassanngortitsisarfimmi eqqartuussisut isumaqatigiittut aalajangerpaat.

Amerikap Danmarkimi aallartitaqarfia KNR-imut taama nalunaarpoq.

Aamma atuaruk Pituffimmi kiffartuussinissamik isumaqatigiissut danskit suliffeqarfiutaasa annaavaat

Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera

Tusarniaanerni siusinnerusukkut pisuni eqqartuussisut erseqqissarsimavaat, sullissisussarsiornermi oqaasertarineqartut toqqammaviginiarlugit, USA'p danskillu kunngeqarfiata Pituffik pillugu politikkikkut isumaqatigiissutaat aallaaviginagit.

Greenland Contractorsimi pisortaq Peter Kofoed KNR-imut oqarpoq politikerit nunani pingasuneersut tamanna maanna aalajangiiffigisariaqaraat.

- Inatsisit allaapput, politikkilu allaalluni. Tullinnguuppoq politikikkut qanoq iliuuseqarnissap misissornissaa. Nunanummi allanut tunngasunut ministerit nunani pingasuneersut erseqqissumik oqaatigisimavaat USA kukkuluttorsimasoq, GC-meersoq KNR-imut oqarpoq.

Aamma atuaruk Kristian Jensen: Greenland Contractors Pituffimmiiginnassaaq

USA'p nunanut allanut tunngasunut ministeria John Kerry qanittukkut Nunatsinniimmat danskit ministeriat Kristian Jensen oqarpoq USA nassuersimasoq Exelisip Pituffimmi sullissisussanngorneranik isumaqatigiissuteqarnera kukkunerusoq.

Greenland Contractorsip pisortaata Peter Kofoedip naatsorsuutigigallarpaa ukiamut septembarip 30-iata tungaanut Pituffimmiiginnassallutik, isumaqatigiissummi atuuttoq ulloq taanna naasussaammat.

Amerikami illersornissaqarfiup oqaatigereernikuuaa Pituffimmi sullissinermi ingerlatsisup taarsernissaa qaammatinik arfinilinnik arfineq pingasunilluunniit sivisutigisinnaasoq.

Exelis Servicesip Danmarkimi oqaaseqartartua Kim Rubjerg oqaaseqarnissaq pillugu piginnittumut Vectrusimut innersuussivoq.

Aamma atuaruk Eqqartuussissuserisup Pituffik pillugu suliamik misissuinera uani atuaruk