PITUFFIK Kristian Jensen: Greenland Contractors Pituffimmiiginnassaaq
USA-mi eqqartuussisisutigut suliat arlariit 2017-ip tungaanut ingerlanneqarnerini Greenland Contractors A/S-ip amerikamiut sakkutooqarfianni kiffartuussinissamik isumaqatigiissut pigiinnarallaassavaa.
Danskit nunanut allanut tunngasunut ministeriata Folketingip Kalaallit Nunaannut tunngasunut ataatsimiititaliaani ullumi isumasioqatigiinnissaq sioqqullugu isumasioqatigiinnermilu tamanna uppernarsarpaa.
- Suliaq inerneqartinnagu Greenland Contractorsip isumaqatigiissutaata pioreersup ingerlaannarsinnaanissaa naatsorsuutigilluinnarpara, Kristian Jensen (V) taama oqarpoq.
Greenland Contractorsip pisortaanerata Peter Kofoedip ingerlatseqatigiiffiup Pituffimmi kiffartuussinissamik isumaqatigiissuteqarfigineqarnerata qaammatinik pingasunik, tassalu ukiormanna juulip qaammataa naanissaata tungaanut, sivitsorneqarsimanera KNR-imut uppernarsarpaa. Tamatumunnga peqatigitillugu GC 2017-imi oktobarip qaammataata tungaanut arlaleriarluni sivitsueqqinnissamik aamma periarfissinneqarpoq.
Eqqartuussisutigut suliat sivisusinnaasut
Greenland Contractorsimut, Namminersorlutik Oqartussanit piginneqataaffigineqartumut, Pituffimmi kiffartuussinissamik isumaqatigiissut siorna upernaakkut qaammatinik aqqaneq-marlunnik sivitsorneqarpoq. Kiffartuussinissamik isumaqatigiissutip ingerlatseqatigiiffimmut Exelis Services A/S-imut tunniunneqarsimanerata Amerikami eqqartuussivimmit Federal Court of Claimsimit atortussaajunnaarsinneqarnerata kingorna tamanna pivoq.
Ingerlatseqatigiiffiup USA-meersuunera peqqutaatinneqarpoq taamaattumillu aamma Danmarkip, Nunatta USA-llu akornanni illersornissaq pillugu isumaqatigiissutaasumi amerikamiut sakkutooqarfianni danskinik/kalaallinik isumaqatigiissuteqarnissamik isumaqatigiissutaasumut naapertuunnani.
Aamma atuaruk USA Pituffik pillugu eqqartuussissulersuinernut ilannguttoq
Pituffimmili kiffartuussinissamik isumaqatigiissutip 2,4 milliardit koruunit missaannik nalillip kimut tunniunneqarnissaa pillugu suliaq kingorna politikkikkut inatsisitigullu assorsuuttaalerpoq. Tamatumunngalu peqatigitillugu ingerlatseqatigiiffiit kiffartuussinissamik isumaqatigiissummut neqeroortut tamarmik amerikamiut naalagaaffiat suliaq pillugu eqqartuussisutigut suliassanngortippaat.
Suliat qaammatini tulliuttuni marlunni imaluunniit arfinilinni aalajangiiffigineqarnissaat danskit nunanut allanut tunngasunut ministereqarfiata naatsorsuutigaa. Eqqartuussiviilli aalajangernerat ingerlatseqatigiiffiit USA-mi eqqartuussiviit qullersaannut suliassanngorteqqissinnaavaat, suliassanngortitseqqittoqassanersorlu tassani ullut 90-it atorlugit naliliiffiginiarneqassalluni. Suliassanngorteqqinneqassappatalu suliat ingerlaqqissapput 2017-imi aatsaat naammasineqartussatut naatsorsuutigineqarsinnaallutik.
Aamma atuaruk Greenland Contractorsit Pituffimmut nutaamik isumaqatigiissuteqarput
- Amerikami eqqartuussiveqarnerup iluani suliassanngortitseqqinnissamut periarfissarpassuaqarnera pissutigalugu sivisuupilussuarmik utaqqisoqaratarsinnaavoq. Oqareernittullu, Greenland Contractorsimut isumaqatigiissutip pioreersup ingerlaannarnissaa uanga naatsorsuutigaara. USA-li isumaqatigiissusiortuuvoq aalajangiisussaallunilu, Kristian Jensen oqarpoq.
GC-ip 2016-imi juulip naanerata tungaanut, 2017-imi septembarip tungaanut sivitsueqqinnissamik periarfissaqartinneqarluni, maannami isumaqatigiissutigisaaa sivitsorneqartoq Greenland Contractorsip USA-llu Københavnimi aallartitaqarfiata KNR-imut uppernarsarpaat.
