Filmi piviusulersaarut Nuka Eskimo Diva takutinneqalerpoq

Filmimi piviusulersaarummi malinnaavigineqarpoq angut kalaaleq inuusuttoq ulluinnarni inuttut inuunermini atukkani sorsuutigigai naak inuiaqatigiit avatangiiserisami tamakkiisumik akuerinngikkaluaraanni.
 
Nuka Eskimo Diva-mik taaguuteqartoq tassaavoq 24-nik ukiulik Nuka Bisgaard Nuummingaaneersoq, taanna arnatut atisalersorluni nunatsinni europamilu takutitsisarnera ilisimaneqarpoq.
 
Filmimik ilitsersuisup Lene Stæhrip, filmimi immiussai siulliit ukiut arfinillit matuma siorna filmiliarineqarput, tassani malinnaavigineqarpoq angut inuusuttoq nammineq qanoq inuuneqassalluni aalajangersimagaa tassanilu ukiut arfinillit ingerlannerani inuunera malinnaavigineqarluni.
 
- Kalaallit Nunaanni ileqqutoqat atorneqarajupput, sinerissami illoqarfinni nunaqarfinniluunniit najugaqaraanni isummanik nutaanik allaanerusumilluunniit inuuneqarnissaq ajornakusoorsinnaasarluni, Nuka Bisgaard oqarpoq.
 
-  Neriuutigaarput filmiliarput inuusuttut akornanni oqallinnermik pilersitsiumaartoq piumassuseqalersitsillunilu. Kinaassutip pisinnaatitaaffeqarneranut tunngassuteqarpoq.
 
Filmip piviusulersaarutip Nuka Eskimo Divap suliarineqarneranut tapiisuupput, Det Danske Filminstitut, Space Rocket Nation aamma Danmarks Radio.