Fabrikkimi ikuallanneq: Takunnissimasunik suli ujaarlertoqartoq

Royal Greenlandip Ilulissani fabrikkiata ikuallanneranut ilisimannissinnaasunik Ilulissani politiit suli pissarsiorput. Ikuallanneq nalunaarutigineqarpoq maajip ulluisa aallaqqaatani unnukkut qulinut

Assi © : Arnaq Liebhardt

Allattoq Karsten Sommer

juulip 30-at 2016 17:03

Nutserisoq Jaaku Lyberth

Ikuallannermut pissutaasup paasiniarneqarnerani innaallagissamut attaviit ikuallannermut pissutaanngitsut paasineqarpoq, maannalu piaaraluni ikuallatsisoqarsimasoq inerniliunneqarallarpoq.

Aamma atuaruk Politiit: Ilulissani ikuallatitsisoqarsimanissaa aallaavigaarput

Nakkutiginninnermi atortunit assilisanit takuneqarsinnaavoq, biili qaqortumik qalipaatilik usisaateralik ikuallannerup allartinnerata nalaani fabrikkip eqqaanut pisoq.

Biili fabrikkimit qimagummat, Royal Greenlandip fabrikkiata iigaata avannamut kitaanut sammisuani annertuumik pujuliortoqalerpoq, kinguninngualu annertoorujussuarmik ikuallalerluni.

Aamma atuaruk VIDEO Ilulissani ikuallannerujussuaq

Biili fabrikkip eqqaanut pisoq ilisarineqarsinnaasimanngilaq, politikommisæriugallartoq Carl Sværd tamanut saaffiginnissuteqarluni taama oqarpoq.

Takunnittut arlaqartut nassuiaateqarnerminni meeqqat sisamat qulit aqqaneq marlullu missaannik ukioqartut unnukkut qulit missaanni fabrikkip eqqaaniittut takusimallugit oqaluttuarput.

Video atorlugu nakkutiginnillu assilisanit tamanna uppernarsineqarsinnaasimanngilaq

Meeqqat sisamat takuneqartut kikkuusinnaanerannik ilisimannissinnaasunik Ilulissani politiit oqaloqateqarusupput, imaluunniit biilimik qaqortumik qalipaatilimmik usisaateralimmik ilisimasaqartunik.

Pineqartut pillugit ilisimasaqarsinnaasut takunnisimasulluunniit Ilulissani politiinut saaffiginneqquneqarput, Ilulissani politiit oqarasuaataata normoraat 70 14 22 - 70 14 22.

Aamma atuaruk ASSIT Qatserisartut marluk napparsimmavimmut unitsinneqartut

Aamma atuaruk Royal Greenlandip Ilulissani suliffissua unnuaq ikuallappoq