VIDEO Ilulissani ikuallannerujussuaq

Suliffissuaq ippassaq unnukkut ikuallalermat qaartoqarpallannera Ilulissat illoqarfiata ilarujussuani tusaaneqarsinnaasimavoq. Ilulissani tunisassiorfik ikuallannerani tunisassiorfivittaa eqqorneqanngilaq, Royal Greenland paasissutissiivoq.

Allattoq Bibi Nathansen, Sara K. Jakobsen

maajip 02-at 2016 16:00

Politiit, qatserisartut peqqinnissaqarfillu ippassaq unnukkut qulit qaangilaaraa kalerrinneqarput, politiillu apuummata ikuallannera illup avannamut sammisortaanut siaruaatereersimavoq, pujuliortorujussuanngoreersimallunilu.

Ikuallanneq ullaassaq sisamanut qiteqquttoq aatsaat qaminneqarsinnaasimavoq.

Aamma atuaruk ASSIT Qatserisartut marluk napparsimmavimmut unitsinneqartut

Tunisassiorfivittaali eqqorneqanngilaq, raajanillu tunisassiorneq ullup qeqqata missaani aallarteqqinneqassaaq, Royal Greenland tusagassiuutinut nalunaarummi allappoq.

- Ilulissani tunisassiorfiup ikuallannera sulisunik tunisassiorfivittavianillu qujanartumik eqquinngilaq. Innaallagissap aqqutai tamarmik ajoquteqanngillat, tunisassiorfimmi ingerlatsisoq Jensigne Schmidt oqarpoq, nangillunilu:

- Poortuutissatut uninngasuutigut ikuallannermit aamma eqqorneqarsimanngillat, taamaammat qaleralinnik raajanillu tulaassuineq nalunaaquttap akunnerinik arlalialunnik kingusinaarluta aallarteqqippagut.

Aamma atuaruk Royal Greenlandip Ilulissani suliffissua unnuaq ikuallappoq

Ilulissani politiit piaaraluni ikuallatsitsisoqarsimanersoq misissorpaat

- Ikuallannerup aallartiffia eqqumiittoqartikkatsigu pasitsappugut. Palitsit akornanni ikuallalersimavoq, naak ullut tamaat masarlunnikuullunilu nittaalarnikuusoq. Taamatut nammineq ikuallattoqalersinnaannginnami pasittaapparput, Ilulissani politikommissæriugallartoq Carls Sværd oqarpoq.

Qatserisartut marluk qamitsiniartut Ilulissani napparsimmavimmut unitsinneqartariaqarsimapput, tassanilu nakkutigisassanngortinneqarlutik.