ASSIT Qatserisartut marluk napparsimmavimmut unitsinneqartut

Royal Greenlandip Ilulissani suliffissuata unnuaq ikuallannerani qatserisartut marluk qamitsiniartut Ilulissani napparsimmavimmut unitsinneqartariaqarsimapput, tassanilu nakkutigisassanngortinneqarlutik. Piaaralunilu ikuallatsitsisoqarsimasoq politiit pasitsapput.

Allattoq Karsten Sommer

maajip 02-at 2016 10:11

Nutserisoq Mads Lynge

Suliffissuaq ippassaq unnukkut ikuallalermat qaartoqarpallannera Ilulissat illoqarfiata ilarujussuani tusaaneqarsinnaasimavoq.

Politiit, qatserisartut peqqinnissaqarfillu ippassaq unnukkut qulit qaangilaaraa kalerrinneqarput, politiillu apuummata ikuallannera illup avannamut sammisortaanut siaruaatereersimavoq, pujuliortorujussuanngoreersimallunilu.

Sulisut kingorna qimagutitinneqarput, suliffissuullu eqqaa assersorneqarluni.

Piaaraluni ikuallatsitsisoqarsimanersoq politiit maanna misissuiffigaat.

- Ikuallannerup aallartiffia eqqumiittoqartikkatsigu pasitsappugut. Palitsit akornanni ikuallalersimavoq, naak ullut tamaat masarlunnikuullunilu nittaalarnikuusoq. Taamatut nammineq ikuallattoqalersinnaannginnami pasittaapparput, Ilulissani politikommissæri Carls Sværd oqarpoq.

Aamma atuaruk Royal Greenlandip Ilulissani suliffissua unnuaq ikuallappoq

Ikuallanera ullaassaq sisamanut qiteqquttoq qaminneqarpoq, ikuallannera illup qaliata ornikkuminaattup nalaanut siaruaassimalluni.

Takunnittut arlallit politiinit killisiorneqarput, aalisartut arlallit taakkununnga ilaallutik. Piaaraluni ikuallatsitsisoqarsimanersoq paasiniarneqaleruttorpoq, killisiorneqartullu tassunga atatillugu iluaqutigineqarsinnaassagunarput.

Politiilli takunnissimasinnaasunik allanik pissarsiorput, ikuallannerup aallartinneranik takunnissimasinnaasut, allatigulluunniit ilisimannissinnaasunik pissarsiorlutik.

Ilulissani politiit 70 14 22-mut attavigineqarsinnaapput.