Exelis Service suliassanngortitseqqiivoq

Eqqartuussutillu suliassanngorteqqinnissaanut ulloq manna killigitinneqarpoq.

Amerikami eqqartuussiviup U.S. Federal Court of Claimip eqqartuussutaa suliassanngorteqqinniarlugu Exelis Service aalajangerpoq.

Eqqartuussutip inernera maajimi nalunaarutigineqarpoq, suliffeqarfiullu pineqartup ukiormanna oktobarip qaammataanit Pituffimmi kiffartuussinissamik isumaqatigiissuteqarfigineqarnera atortussaajunnaarsinneqarluni.

Aamma atuaruk Utaqqiisaasumik isumaqatigiissuteqarnissaq GC-p nuannaarutigaa

- Neqeroorutitta pitsaanerpaajunera eqqartuussivimmit naqissuserneqareerpoq, taamaammat suliamut peqataatinneqarataluunniit neqeroorutigisatta ingerlannissaanik arsaarneqarnerput tulluanngilluinnartutut isigaarput, Exelis Servicep oqaaseqartartua Kim Rubjerg taama oqarpoq.

Taanna kiffartuussinissamik isumaqatigiissummut tunngatillugu suliami suliffeqarfimmi kiap kukkusumik iliuuseqarsimaneranut oqaaseqarumanngilaq, suliassanngortitseqqiinissaq pissutigalugu.

Aamma atuaruk Pituffimmi kiffartuussinissamik isumaqatigiissut US Air Forcep sivitsorusukkaa

Kim Rubjergilli Exelis Servicep suliariumannittussarsiuussinermi aki pissutigalugu ajugaanera erseqqissarpaa - suliassanngortitseqqinnermilu isumaqatigiissutip utertinneqarnissaa siunertaanerarlugu.

- Isumaqatigiissut Pituffimmut, sulisunut, Kalaallit Nunaannut aammalu soorunami amerikamiut sakkutooqarfiannut pitsaanerpaajusoq ingerlatiinnarsinnaassallugu soorunami neriuutigaarput.

Exelis Servicep siorna ukiakkut suliariumannittussarsiuussisoqarnerata kingorna kiffartuussinissamik isumaqatigiissuteqarfigineqarsinnaanera Amerikami naalakkersuisut allaffeqarfiannit GAO-mit februaarimi naqissuserneqarpoq.

Aamma atuaruk Exelis suliassanngortitseqqilersoq

Suliffeqarfiilli suliariumannittussarsiuussinermi neqeroortut allat - Greenland Contractors I/S-ip, Per Aarslevip aamma Copenhagen Arctic A/S-ip naammagittaalliuteqarnerisa kingorna Amerikami eqqartuussiviup naammagittaalliuteqartarfiup aalajangiineq taanna maajimi atortussaajunnaarsippaa.

Aalajangiinerlu taanna eqqartuussivimmut qaffasinnerusumut suliassanngorteqqinniarlugu Exelis Service maanna aalajangerpoq.