EU-p issittormiut pillugit ilisimasaqarnerulernissaanut Nunarput kajumissaaruteqartoq
EU-p Issittumi Siunnersuisooqatigiinni alaatsinaattutut inissisimalernissamik qinnuteqaataa Naalagaaffeqatigiinnit tapersersorneqarpoq, aamma periarfissaq atorlugu EU-p Issittumi pissutsinik paasitinniarneqarsinnaavoq. Inatsisartut Nunanut allanut Sillimaniarnermullu ataatsimiititaliaat isumaqatigiissoq taama isumaqarpoq.
Issittumi Siunnersuisooqatigiinnut ilaasortat
Canada
USA
Rusland
Finland
Norge
Sverige
Island
Kunngeqarfik Danmark
Taamaammat nunanut allanut naalakkersuisup Vittus Qujaukitsup Issittumi Siunnersuisooqatigiinni ministerit tallimanngorpat ataatsimiinnerannut peqataanermini oqaaseqarsinnaanini atorlugu puisinniarneq EU-llu puisit amiinik EU-mut eqqusseqqusinnginnermit naggueqatigiit Inuit pineqannginnissaannik aalajangernerup sukateriffigineqarnissaanik siunnersuutaata kingunerisassai pillugit immikkut sammisaqarnissaa ataatsimiititaliamit siunnersuutigineqarpoq.
EU-p politikkiani imminnut assortortoqarsorigaat
Nunanut allanut Sillimaniarnermullu ataatsimiititaliap erseqqissaatigaa, EU-p Issittumik soqutiginninnerujussua EU-llu puisit amiinik EU-mut eqqusseqqusinnginnermit naggueqatigiit Inuit pineqannginnissaannik aalajangernerup sukateriffigineqarnissaanik siunnersuutaa imminnut assortortuusut.
Aamma atuaruk Krusep piniartut eqqugaasinnaanerat ernumagigaa
Aamma atuaruk Inuit puisittaanik EU-mut tuniniaaqqusinnginneq uterfiginiarpaat
EU-p Issittumi Siunnersuisooqatigiinni alaatsinaattutut inissisimalernissaa Naalagaaffeqatigiit akueriniarpaat, aamma EU-p alaatsinaattutut inissisimalernissaa Issittumi Siunnersuisooqatigiinni ministerit ukiormanna ataatsimiinneranni pisortatigoortunngortinnissaa naatsorsuutigineqarpoq. Naalagaaffeqatigiit ataasiaannarlutik taasisinnaapput, EU-lu akueralugu taasiniarput. Taamatullu inissisimasoqarnera nunanut allanut sillimaniarnermullu ataatsimiititaliap tusaaniarneqarnissamut atorniarpaa.
Naggueqatigiit Inuit pisinnaatitaaffii ataqqisigit
Ataatsimiititaliap EU kajumissaarpaa Issittumi pissutsit issittormiullu inuuniarnikkut atugarisaat pillugit EU-mi innuttaasut ilisimasaqarnerulernissaannut pimoorussamik sulissuteqaqqullugu.
- Minnerunngitsumillu EU-mut kajumissaarutigaarput naggueqatigiit Inuit kuturiminnik ineriartortitsinissaminnut pisuussutiminnillu piujuaannartitsinissaq tunngavigalugu atuinissaminnut pisinnaatitaaffeqarnerat tamakkiisumik ataqqeqqullugu. Illuatungeriit paaseqatigiillutik ataqqeqatigiillutillugu naapissinnaasariaqarput, tamanna suleqatigiilluarnissamut tunngavissiissammat, ataatsimiititaliamit taama oqaatigineqarpoq.
Aamma atuaruk Johan Lund Olsen: EU Issittumi Siunnersuisoqatigiinni ilaasariaqarpoq
Aamma atuaruk Danmarkip EU Issittumi Siunnersuisoqatigiinni ilaatikkusuppaa