Inuit puisittaannik EU-mut tuniniaaqqusinnginneq uterfiginiarpaat

Maannakkutut itsillugu puisinit tunisassiat nioqqutigineqaqqusaannginnerannik pineqanngitsut assigiinngitsut marluupput.

Siulleq tassaavoq Naggueqatigiit Inuit pineqannginnerat. Tassani inuit nunallu inoqqaavi allat puisinit tunisassianik EU-mut tuniniaaginnaarsinaapput, taamaaliorneq inuuniarnerannut iluaqutaappat.

Pineqanngitsut aappaat tassaavoq, immami pisuussutit nappanneqarsinnaasumik aqunneqarnissaat siunertaralugu puisinik ikilisaalluni piniarnikkut pisanit tunisassiat.

Puisinit tunisassiat inuiaqatigiit tamakkerlugit puisittaannit amerlanerussanngillat

Allannguutissanili nutaani Inuit nunallu inoqqaavi allat puisinit tunisassianik aatsaat tuniniaasinaassapput, puisip ajoquserneqarnissaa minnerpaaffissaminiitillugu toqunneqarsimappat, taavalu puisinit tunisassiat niuffatigineqartut, inuiaqatigiit tamakkerlutik puisiminernit pisiaannit amerlanerussanngitsut.

Kommissionip aamma puisinit tunisassiat niuffatigineqartut amerlassusii killilersorsinnaarusuppai, isumaqarunik, niuffanneq inuussutissarsiornermik tungaveqartoq.

Aamma puisinik ikilisaaniarluni pisanit tunisassiat tuniniarneqarnissaat pisiarineqarnissaallu akuerineqarunnaassasoq EU-kommissionip siunersuutigaa, isumaqaramik, taama piniarneq niuernissaq siunertaralugu piniarnermit immikkoortikkuminaatsoq.

Siunnersuummut akissutissat oktobarimi tunniunneqariissapput

Allannguutissatut siunnersuutit tamakkua Europa-kommissionip ukioq manna februaarip qulingiluaani nassiuppai, EU-llu siunersuutaannut akissutissat kingusinnerpaamik ukioq manna oktobarimi tunniuneqariissapput.

Taamaammat iliuuseqarnissamut piffissakippoq.

Immaqalu tamanna peqqutigerpiarlugu Folketingimut ilaasortat, Siumumeersoq Doris Jakobsen IA-meersorlu Johan Lund Olsen, allannguutissatut siunnersuutit ernumanartoqartillugit Europa-Parlamentimi ilaasortanut qallunaanut ersersinniarlugu nalunaareerput.

Aamma atuaruk Doris Jakobsen: Puisit amiinik avammut niuernerput EU-p akornuseqqinniarpaa

Puisinit tunisassianik EU-mi niuffatiginninnissaq taamani inerteqqutigineqalerpoq, oqarnerattut "puisinik toqutsinermi uumasut atugarissaarnissaannut tunngasutigut innuttaasut nangaanartoqartitsinerat" peqqutigalugu.

Taamani inerteqquteqalersinnagu kingunerusinnaasut misissorneqarput, maannali allannguiniarlernermi, kingunerusinaasunik misissuisoqanngilaq.

Taamaaliunnginnermut allannguutissat politikerinit siunnersuutaanatik, EU-p inatsisaasa maanna atuuttut WTO-p aalajangigaanut naleqqussaataannaanerat peqqutaatineqaneqarpoq.