Politikki

Johan Lund Olsen: EU Issittumi Siunnersuisoqatigiinni ilaasariaqarpoq

EU Issittumi Siunnersuisoqatigiinni alaatsinaatsutut ilaasortanngussappat tamanna Great Greenlandimut Nunatsinnilu piniartunut minnerunngitsumillu nunaqarfimmiunut isorliunerusunullu aningaasatigut iluaqusiisinnaavoq, folketingimi ilaasortaq, Johan Lund Olsen, Inuit Ataqatigiinnersoq taama isumaqarpoq.

Allattoq Apollo Jeremiassen

decembarip 29-at 2014 16:18

- Taamaammat tassuunakkut allannguisoqarsinnaappat tamanna Nunatta aningaasaqarneranut minnerunngitsumillu piniartortatsinnut nunaqarfimmiunullu tamanna iluaqusiisussaassaaq, Johan Lund Olsen KNR-imut oqarpoq.

Folketingimut ilasortap, Johan Lund Olsenip nuannaarutigaa, Christiansborgimi partiit arlallit ilaatigut Kalaallit Nunaat pillugu SF-ip oqaaseqartartuata, Holger K. Nielsenip taamatullu danskit nunanut allanut tunngasunut ministererisimasaata, Per Stig Møllerip, EU-p Issittumi Siunnersuisoqatigiinni alaatsinaatsutut ilaasortaalernissaanik kissaataat tusareerlugulu.

- Soorunami taakku isumaqatigaakka oqarmata, issittumi pissutsit ukiuni makkuni taama allanngoriartortigimmata, pissusissamisuussaaq EU Issittumi Siunnersuisoqatigiinni alaatsinaatsutut ilaasuuppat. Kisianni tamanna soorunami EU-mut piumasaqaatitaqartariaqarpoq, Johan Lund Olsen KNR-imut oqarpoq.

Aamma atuaruk Danmarkip EU Issittumi Siunnersuisoqatigiinni ilaatikkusuppaa

Johan Lund Olsenip piumasaqaatigineqarsinnaasutut taavai, EU-p puisinniarneq pillugu Kalaallit Nunaannut killilersuijuarnertik taamatullu arfanniarneq pillugu politikkertik allanngortittariaqaraat.

- Tassami isumaqarpunga apeqqutit tamakku Danmarkilu suleqatigiissutigisariaqarigut. Danmarkimut uteriaruma tamanna partiinut assigiinngitsunut saqqummiutissavara, tassami isumaqarama piumasaqaatigiumaakkavut EU-miit akuersaartumik tiguneqaqqaartariaqartut Issittumi Siunnersuisoqatigiinnut alaatsinaattutut ilaasortanngussagunik.

Johan Lund Olsen oqarpoq, neriullunilu EU alaatsinaatsutut ilaasortanngorpat, tamanna Nunatta aningaasaqarneranut iluaqusiiumaartoq.

- Nunatsinni puisinniarnermut taamatullu arfanniarnermut EU-p politikkini allanngortippagu tamanna Nunatta aningaasarsiorneranut iluaqutaassaqaaq minnerunngitsumik piniartortartsinnut isorliunerusortatsinnullu. Folketingimut ilaasortaq taama oqarpoq imalu nangilluni.

- Tamannalu aamma Great Greenlandimut annertoorujussuarmik aningaasatigut ilorraap tungaanut iluaqusiissaaq. Tassami puisit amii EU-mut eqquteqqusaajunnaanngitsiarnerani, Great Greenlandi ukiumut 60 millioner koruunit sinnerlugit ukiumut kaaviiartitsisarpoq maannali taamaallat 6 millioner koruuninut tamanna apparluni.