Eqqumiitsuliornikkut unammisitsinermi nunatsinneersoq ajugaasoq
Canadap Issittumi Siunnersuisoqatigiinni siulittaasuuffeqarnerata naggaserniarneranut atatillugu siulittaasuusimalertussat inuusuttunut Issittumiittunut eqqumiitsuliornikkut unammisitsipput.
Issittumi inuusuttut 18-init 25-t tungaannut ukiullit sammisaq ”Issittumi inuiaqatigiit ineriartornissaat” najoqqutaralugu ilanngussassanik nassitsinissaannik kaammattorneqarput.
Ilanngussat assigiinngitsut 20-t unammisitsinermut nassiunneqarsimapput, suliallu qanoq nutaaliaatiginera, katiterneqarnerata pitsaassusaa sammisallu qanoq nassuiarluartigineqarnera aallaavigalugu nalilersorneqarlutik.
Nunatsinnit marluk peqataatinneqarput
Namminersorlutik Oqartussat ICC Greenlandillu ataatsimoorlutik Kalaallit Nunaannit ilanngussassanik marlunnik unammisitsinermut nassiussisimapput.
Ilanngussani taakkunani suliaq ataaseq ”Woman and the Ulu”-mik taaguuteqarpoq, Amma Kvistimit 21-nik ukiulimmit suliarineqarsimasoq taannalu ajugaasutut akissarsitinneqarpoq.
Suliani pillugu Amma Kvist oqarpoq:
- Taanna suliara assut isumaqartippara, arnaq kalaaleq ulumut tarrarsortoq. Ulumut tarrarsorpoq pissutigalugu kalaaliunini tarrarsuutigigamiuk. Uanga kalaaliunera assut pingaartikkakku. Ulu arnat savigivaat, qanga assut atortarpaat, taamaasillunga ulumut tarrarsortippara.
Suliat inissilluarnerpaat pingasut Canada Goosemit parkanik pinnatassaqarput.