Kalaallinut filmiliortartunut aningaasaliissutit millionimik ilaneqartut
Nunatsinni filmiliornermik suliniutinut aningaasaliissutit millionimik ilaneqarput - 1.883.000 koruuninit 2.883.000 koruuninut.
Aningaasaliissutillu millionimik ilaneqarnerat ilaatigut Emilé Hertling Peronardip nuannaarutigaa. Taanna Inuk Silis Høegh peqatigalugu nipilersoqatigiit Sume pillugit filmi piviusulersaarut siorna saqqummersippaa filmilu nunarsuarmi sumiiffinni assigiinngitsorpassuarni takutinneqarpoq.
- Aningaasaliissutit millionimik ilaneqarnerat Nunatsinni filmiliortarnermut siuariartuinnartumut Nunattalu avataanut siammaraluttuinnartumut ataqqinaatissaavoq, Emilé Hertling Peronard Facebookkimi taama allappoq, aammalu aningaasaliissutit millionimik ilaneqarnerat immaqa annertugisassaanngitsutut nipeqaraluartoq ukiut siuliinut 65 procentit sinnerlugit amerlineqarnerat erseqqissaatigalugu.
Nunatsinni filmiliat ukiuni kingullerni nuannarineqarnerpaat ilaat, Qaqqat Alannguani, unnugu KNR tv-kkut siullerpaamik nalunaaqutaq 20.30 aallakaatinneqassaaq. Filmi qiiaamminartuliaq inuusuttut arfinillit Nuup Kangerluani tammaarsimaarnerminni misigisaannut tunngasoq.
